जगभरात इलेक्ट्रीक वाहनांच्या मागणीत वाढ होतच आहे. परंतू, टेस्ला सारख्या कंपनीच्या मागणीत मोठी घट झाली आहे. याला राजकीय कारणे जरी असली तरी एक अशी कंपनी आहे जिने टेस्लाच्याही नाकीनऊ आणले आहेत. चीनची कंपनी बीवायडीची एक अशी कार आहे, जी जगभरातील १०० देशांत उपलब्ध करण्यात आली आहे आणि निम्म्यापेक्षा जास्त जगाची ईव्ही जगतातील बादशहा झाली आहे.
यामुळे सर्वच देशांच्या ऑटो कंपन्यांनी धास्ती घेतली आहे. नुकताच बीवायडी अट्टो ३ या कारने जगात १० लाख युनिट विक्रीचा टप्पा पार केला आहे. जगासाठी ही कार BYD Atto 3 असली तरी चीनमध्ये या कारचे नाव Yuan Plus असे आहे. ही कार २०२२ मध्ये पहिल्यांदा लाँच करण्यात आली होती. परंतू, तेव्हा कोरोना असल्याने जगभरात चिनी कंपन्यांना विरोध सहन करावा लागत होता.
चीनमध्ये पहिल्या १४ महिन्यांत या कारची ३ लाख युनिट विकली गेली. यानंतरच्या सहा महिन्यांत कंपनीने आणखी दोन लाख कार विकल्या. या २० महिन्यांनंतर कंपनीने भारतासह जगभरातील १०० देशांत ही कार लाँच केली. आजची या कारची विक्री पाहिली तर जगभरात दिवसाला ही कंपनी ७१९ कार विकत आहे. तर लाँच केल्यापासूनच्या 1,391 दिवसांत कंपनीने १० लाख युनिट विकल्या आहेत.
भारतातील विक्रीबाबत सांगायचे झाले तर या कंपनीच्या कार मुंबई, पुण्यासारख्या शहरात दिसत आहेत, परंतू त्या तुरळक आहेत. अद्याप बीवायडी भारतात पाय रोवू शकलेली नाही. २०२१ पासून ही कंपनी भारतीय बाजारात उतरली आहे. थोड्याच काळात टेस्ला देखील भारतीय बाजारात येणार आहे. याचा फटका सध्या भारतात ईव्ही सेक्टरमध्ये बादशाह असलेल्या टाटाला बसू शकतो. टाटा पाठोपाठ एमजी इंडियादेखील ईव्ही कारची चांगली विक्री करत आहे.