वाहने होणार महाग; पर्यावरण करात दुपटीने वाढ, प्रदूषण रोखण्यासाठी कडक पाऊल

पेट्रोलवरील हलके मोटार वाहन, डिझेल कारच्या वाहनांवरील पर्यावरणकरात वाढ

पुणे : जुन्या वाहनांचा वापर कमी करून वाढते प्रदूषण रोखण्याच्या उद्देशाने, पर्यावरणपूरक वाहनांना चालना देण्यासाठी येत्या (दि. १ एप्रिल) बुधवारपासून पर्यावरण करात दुपटीने वाढ होणार आहे. दुचाकी वाहनांवरील पर्यावरण कर दोन हजार रुपयांवरून वाढवून चार हजार रुपये करण्यात आला आहे, तर पेट्रोलवरील हलके मोटार वाहन, डिझेल कारच्या वाहनांवरील पर्यावरणकरात वाढ होणार आहे.

जुन्या वाहनांमुळे प्रदूषणात वाढ होऊ नये, यासाठी परिवहन विभागामार्फत २०१० पासून पर्यावरण कर आकारला जात आहे. हा पर्यावरण कर भरून घेताना त्या वाहनामुळे प्रदूषण होत नाही ना, याची खात्री करून घेतली जाते. तसेच सुरक्षित वाहतुकीसाठीचे निकष ते पूर्ण करीत असेल, तरच हा कर भरून घेतला जातो. मात्र, आता जुन्या आणि प्रदूषणाला कारणीभूत ठरणाऱ्या वाहनांवरील पर्यावरण करात दुप्पटने वाढ करण्यात आली आहे.

व्यावसायिक वाहनांना १५ वर्षानंतर फिटनेस प्रमाणपत्र घेणे बंधनकारक आहे. त्यानंतर दर पाच वर्षानी एकरकमी पर्यावरण कर भरावा लागतो. वाढते वायू प्रदूषण रोखण्यासाठी आणि इलेक्ट्रिक वाहनांना प्रोत्साहन देण्यासाठी परिवहन विभागाने पर्यावरण कर दुप्पट केले आहे.

राज्य सरकारने पंधरा वर्षांवरील वाहनांची ग्रीन टॅक्सची रक्कम दुप्पट पद्धतीने वाढ केली आहे. दुचाकी, चारचाकी त्याच प्रमाणात टेम्पो, ट्रक, बस यांच्याही ग्रीन टॅक्समध्ये वाढ केलेली आहे. दुचाकीसाठी ४ हजार रुपये तर चारचाकी वाहनासाठी ७ हजार रुपये मोजावे लागणार आहेत. यामुळे सर्व प्रकारच्या वाहनचालकांचा आर्थिक बोजा हा वाढणार आहे. या वाढीव कराबद्दल आम्ही सरकारचा निषेध करीत आहोत. डॉ. बाबा शिंदे, अध्यक्ष, राज्य वाहन मालक-चालक महासंघ