महिला एस.टी. चालकांची निवड प्रक्रिया अर्ध्यावर

अमरावती : राज्य परिवहन महामंडळातर्फे गतवर्षी जानेवारी महिन्यात राबविलेल्या महिला चालक-वाहक भरती प्रक्रियेत १८ महिला पात्र ठरल्या होत्या. मात्र, महिला उमेदवारांचे प्रशिक्षण कोरोनामुळे अर्ध्यावरच स्थगित केल्याने त्या काही महिन्यांपासून घरीच आहेत. अखेर सोमवारी संध्याकाळी प्रशिक्षणावर स्थगिती उठवण्यात आल्याने उमेदवारांच्या आशा पल्लवित झाल्या आहेत.

राज्य परिवहन महामंडळातर्फे २०१९ मध्ये राज्य भरती महिला व पुरुषांसाठी चालक - वाहक भरती प्रक्रिया राबविण्यात आली होती. यात अमरावती विभागातून महिला चालक-वाहकपदासाठी ५५ आलेल्या अर्जांपैकी १८ महिला अंतिम निवड प्रक्रियेसाठी पात्र ठरल्या होत्या. अंतिम निवड प्रक्रियेतून पात्र ठरलेल्या या महिलांना औरंगाबाद येथे प्रशिक्षणासाठी पाठविले होते, तर काही महिलांना याच ठिकाणी प्रशिक्षण देण्यात येत होते. प्रशिक्षण सुरू असतानाच महामंडळातर्फे कोरोनामुळे महिलांचे प्रशिक्षण अर्ध्यावर स्थगित करण्याचे आदेश देण्यात आले होते. परंतु आता पुन्हा प्रशिक्षण देण्याच्या हालचाली सुरू झाल्या आहेत.

बॉक्स

जिल्ह्यातील आगार ८

बस चालक ८०४

बस वाहक ८६९

महिला चालक ००

बॉक्स

जिल्ह्यातून १८ महिला चालकांची निवड

महामंडळातर्फे जिल्हानिहाय ही भरती प्रक्रिया राबविण्यात आल्यामुळे स्थानिक उमेदवारांना प्राधान्य देण्यात आले होते. अर्ज केलेल्या सर्व उमेदवारांच्या अर्जाची छाननी कागदपत्रांची तपासणी शैक्षणिक अहर्ता आदी बाबी तपासून १८ महिलांची निवड करण्यात आली आहे.

निवड झालेल्या महिलांमध्ये जिल्ह्यातील विविध तालुक्यातील महिलांचा समावेश या महिला घरी थांबून आहेत. मंडळात तर्फे लवकरात लवकर सेवेत घेण्यासाठीची प्रतीक्षा पात्र असलेल्या महिला वर्गाला लागून आहे.

कोट

राज्य परिवहन महामंडळाने कोरोनामुळे आमचे प्रशिक्षण थांबवले होते. यावेळी आम्ही घरीच बसून होतो. मात्र आता प्रशिक्षणावरील स्थगिती उठविल्याने पुन्हा रुजू होण्याची संधी मिळण्याची अपेक्षा आहे.

- प्रिया काळे,

प्रशिक्षणार्थी महिला

कोट

एसटी महामंडळात चालक कम वाहक म्हणून रुजू होणार म्हणून खुप आनंदा झाला. परंतु कोरोनामुळे महामंडळाने आमच्या प्रशिक्षणाला स्थगिती दिली होती. त्यामुळे आता पुन्हा प्रशिक्षण सुरू होऊन सेवेत दाखल होण्याची अपेक्षा आहे.

- प्रिया उमेकर, प्रशिक्षणार्थी महिला

कोट

कोरोनामुळे पुरुषांप्रमाणे महिला चालक-वाहकांच्या प्रशिक्षणालाही महामंडळाने स्थगिती दिली होती. ती आता उठविण्यात आली आहे. महामंडळाकडून या उमेदवारांची सेवा पूर्ववत सुरू करण्याचे आदेश आल्यानंतर या उमेदवारांना वरिष्ठांच्या सूचनेप्रमाणे सेवेत घेण्यात येईल.

- श्रीकांत गभने,

विभाग नियंत्रक