अमरावती : भाऊबीजेसाठी माहेरी आलेल्या महिलेवर अतिप्रसंग करून तिची गळा आवळून हत्या करण्यात आली. ही घटना ५ डिसेंबर रोजी सकाळी ८.३० च्या सुमारास उघड झाली. याप्रकरणी लोणी पोलिसांनी अज्ञाताविरुद्ध हत्या व बलात्काराचा गुन्हा नोंदविला. दरम्यान, घटनेचे गांभीर्य लक्षात घेऊन जिल्हा पोलीस अधीक्षक अविनाश बारगळ, अपर पोलीस अधीक्षक शशिकांत सातव यांनी घटनास्थळी भेट दिली. मृत महिला ही ४२ वर्षांची होती, असे पोलिसांकडून सांगण्यात आले.
पोलीस सूत्रानुसार, चांदूर रेल्वे तालुक्यातील सासर असलेली ती विवाहिता आपल्या मुलांसमवेत ४ डिसेंबर रोजी नांदगाव खंडेश्वर तालुक्यातील लोणी येथे माहेरी भाऊबीजेसाठी आली होती. दरम्यान, ती दुपारी ३ च्या सुमारास शौचास जाते, असे सांगून घराबाहेर पडली. मात्र, बराच वेळ होऊनही ती न परतल्याने पित्यासह कुटुंबातील अन्य सदस्यांनी तिचा शोध घेतला. उशिरा रात्री लोणी पोलीस ठाण्यात फिर्याददेखील नोंदविण्यात आली. रात्रभर तिचा शोध घेण्यात आला. रविवारी सकाळी पुन्हा शोधाशोध सुरू झाली.
सकाळी ८.३०च्या सुमारास लोणी बोंधाळ परिसरात ती सिंदीच्या झाडाखाली मृतावस्थेत आढळून आली. मृतदेहाची ओळख पटविल्यानंतर पंचनामादेखील करण्यात आला. पंचनाम्याअंती तिची साडीने गळा आवळून हत्या करण्यात आल्याचे स्पष्ट झाले. तर, अतिप्रसंगाची बाबदेखील उघड झाली. मृताच्या वडिलांच्या तक्रारीवरून अज्ञाताविरुद्ध भादंविच्या कलम ३०२, ३७६, ३७६ अ अन्वये गुन्हा दाखल करण्यात आला. पुढील तपास, लोणी टाकळीचे ठाणेदार तथा सहायक पोलीस निरीक्षक एच.जी. कुलवंत करीत आहे.
घटनास्थळावरील एकूणच स्थिती, पंचनामा व मृताच्या वडिलांनी व्यक्त केलेल्या शक्यतेवरून या प्रकरणी हत्या व बलात्काराचा गुन्हा नोंदविला. मृतदेह उत्तरीय तपासणीसाठी अमरावतीला पाठविला. तपासाला गती दिली आहे.
एच.जी. कुळवंत, ठाणेदार, लोणी