अमरावती : दारूची पार्टी करून, घरी मुक्कामी राहणाऱ्या व वाकड्या नजरेने पाहणाऱ्या पतीच्या मित्राला लाथाडून एका महिलेने हिमतीने स्वसंरक्षण केले. तो जसे करतो तसे करू दे, असे निर्लज्जपणे सांगणाऱ्या पतीलाही तिने चपराक हाणली. रात्र कशीबशी काढून तिने पोलीस ठाणे गाठले. न्यू स्वाभिमान नगरात २६ डिसेंबर रोजी रात्री २ च्या सुमारास ही घटना घडली.
२५ डिसेंबर रोजी रात्री ८ च्या सुमारास फिर्यादी महिला कामावरून घरी परतली. तेव्हा तिचा पती व त्याचा मित्र सुनील माळोदे (५१, रा. हनुमाननगर) हे घरातच दारू व जेवण आटोपून बसलेले होते. रात्र झाली, तुमच्या मित्राला त्याच्या घरी जायला सांगा, असे तिने पतीला बजावले. मात्र, त्याला न तसे सांगता पतीने तिला शिवीगाळ केली. तथा तो येथेच झोपेल, असे बजावले. त्यामुळे फिर्यादी महिला जेवण करून घराच्या एका कोपऱ्यात झोपी गेली.
रात्री दोनच्या सुमारास सुनील माळोदे याने तिला पाणी मागितले. पाणी देऊन ती पुन्हा झोपी गेली असता, त्याने स्पर्श करून तिला उठविले. तिला घाणेरडी मागणी केली. त्यावर तिने पतीला उठविले. तुमचा दोस्त कसा करतो आहे, ते सांगितले असता, त्याला काहीही न म्हणता पतीने तिलाच चूप बसण्यास सांगितले. तिने १५ व १४ वर्षाच्या मुलांना उठविण्याचा प्रयत्न केला. मात्र, ते उठले नाहीत. त्यामुळे तिने पतीला चपराक हाणली. त्यामुळे चवताळलेल्या पतीने तिला पकडण्याचे फर्मान मित्र सुनीलला सोडले. त्यामुळे स्वसंरक्षणासाठी तिने सुनीलला लाथाडले. तो खाली पडल्याची संधी साधत ती घराबाहेर पडली. दाराची कडी बाहेरून लावून घेत, पहाट होईपर्यंत ती आवारातील बाथरूममध्ये बसून राहिली.
मुलांना मारण्याची धमकी
२६ डिसेंबर रोजी सकाळी ती कशीबशी घरात गेली. त्यावेळी पती व सुनील माळोदे या दोघांनी तिला रात्रीच्या घटनेची वाच्यता केल्यास दोन्ही मुलांचे काय करेल, हे सांगता येत नाही, त्यांना मारून टाकेन, अशी धमकी दिली. त्यामुळे चार दिवस तिने दहशतीत काढले. मात्र, मनाचा हिय्या करून अखेर १ जानेवारी रोजी दुपारी राजापेठ पोलीस ठाणे गाठले. याप्रकरणी खोलापुरी गेट पोलिसांनी महिलेच्या पतीसह सुनील माळोदे याच्याविरूद्ध भादंविचे कलम ३५४, ३५४ अ, ५०४, ५०६, ३४ अन्वये गुन्हा दाखल केला.