धारणी नगरपंचायत निवडणुकीचे प्रभागनिहाय आरक्षण दुसऱ्यादा जाहीर

धारणी नगरपंचायतचा कार्यकाळ २९ नोव्हेंबर रोजी संपत असल्याने १० नोव्हेंबरला पहिल्यांदा प्रभागनिहाय आरक्षण प्रक्रिया पार पडली होती. ती प्रक्रिया चुकीची झाल्याने धारणीवासीयांनी त्यावर आक्षेप नोंदविला होता. त्यावर जिल्हाधिकारी कार्यालयात सुनावणी घेण्यात आली. त्यांनी सदर चुकीची आरक्षण प्रक्रिया राज्य निवडणूक आयोगाकडे पाठविली. त्यांनी २८ डिसेंबरला दुसऱ्यांदा नवीन प्रक्रिया घेण्याचे आदेशित केल्याने बुधवारी नगरपंचायत प्रभागनिहाय आरक्षण जाहीर करण्यात आले.

२०१५ मध्ये राखीव आरक्षित प्रभागाचे आरक्षण वगळून चक्राणू पद्धतीने आरक्षण जाहीर करण्यात आले, तर नागरिकांचे मागास प्रवर्ग, सर्वसाधारण प्रवर्ग व अनुसूचित जाती महिला, अनुसूचित जमाती महिला यासाठी ईश्वरचिठ्ठी पद्धतीने महिलांचे आरक्षण काढण्यात आले. चिमुकली हिमानी पटेल हिच्या हस्ते ईश्वरचिठ्ठी काढून आरक्षण जाहीर करण्यात आले. धारणी नगरपंचायतीच्या १७ प्रभागांमधून प्रभाग १ करिता अनुसूचित जाती महिला, प्रभाग २ करिता अनुसूचित जाती सर्वसाधारण महिला, प्रभाग ३ करिता नागरिकांचा मागास वर्ग महिला, प्रभाग ४ करिता अनुसूचित जमाती महिला, प्रभाग ५ करिता अनुसूचित जमाती सर्वसाधारण, प्रभाग ६ करिता नागरिकांचा मागास प्रवर्ग, प्रभाग ७ करिता सर्वसाधारण, प्रभाग ८ करिता अनुसूचित जमाती सर्वसाधारण, प्रभाग ९ करिता सर्वसाधारण, प्रभाग १० करिता नागरिकांचा मागास प्रवर्ग, प्रभाग ११ करिता सर्वसाधारण महिला, प्रभाग १२ करिता अनुसूचित जमाती महिला, प्रभाग १३ करिता नागरिकांचा मागास प्रवर्ग महिला, प्रभाग १४ करिता सर्वसाधारण महिला, प्रभाग १५ करिता सर्वसाधारण महिला, प्रभाग १६ करिता सर्वसाधारण, प्रभाग १७ करिता नागरिकांचा मागास प्रवर्ग महिला असे आरक्षण जाहीर झाले. निवडणूक लढणाऱ्यांनी प्रभागनिहाय लॉबिंग सुरू केले आहे.