चार नगरपंचायतींच्या मतदार यादीचा कार्यक्रम जाहीर

अमरावती : जिल्ह्यातील चार नगरपंचायतींची दुसऱ्यांदा सार्वत्रिक निवडणूक मार्च महिन्यात होणार आहे. त्या अनुषंगाने मतदार यादीचा कार्यक्रम राज्य निवडणूक आयोगाने मंगळवारी जाहीर केला. त्यानुसार आता ८ मार्चला मतदार केंद्रनिहाय अंतिम मतदार यादी प्रसिद्ध केली जाणार आहे.

जिल्ह्यातील तिवसा, नांदगाव खंडेश्वर, भातकुली अन् धारणी या तालुक्याच्या मुख्यालयी असणाऱ्या नगरपंचायतींची मुदत २९ नोव्हेंबर २०२० ला संपुष्टात आल्याने या नगरपंचायतींवर उपविभागीय अधिकारी (महसूल) यांची प्रशासकपदी नियुक्ती करण्यात आली आहे. जिल्ह्यात कोरोना संसर्गमुळे नगरपंचायतींच्या सार्वत्रिक निवडणूक होणार की नाही याविषयी सर्वत्र चर्चा सुरू असताना मतदार यादीच्या कार्यक्रमाचे आदेश धडकले असल्याने आता मार्च महिन्यात निवडणूक होणार असल्यावर सध्या तरी शिक्कामोर्तब झालेले आहे.

१५ जानेवारी २०२१ हा अर्हता दिनांकावरील विधानसभा मतदारसंघाची मतदार यादी गृहीत धरून प्रभागनिहाय विभाजन करण्यात येणार आहे. या यादीमध्ये लेखनिकाच्या चुका, दुसऱ्या प्रभागातील चुकून अंतर्भूत झालेले मतदार व संबंधित प्रभागातील विधानसभा मतदार यादीत मतदारांची नावे असूनही नगरपंचायतींच्या संबंधित प्रभागाच्या मतदार यादीत वगळण्यात आलेली नावे समाविष्ट करण्यात येणार आहे. याशिवाय चांदूर रेल्वे नगर परिषदेच्या प्रभाग ३ (ब) साठी पोटनिवडणूक होणार असल्याने या प्रभागातही मततदार यादीचा कार्यक्रम आयोगाने जाहीर केला आहे.

बॉक्स

असा आहे कार्यक्रम

* प्रभागनिहाय प्रारूप मततदार यादी प्रसिद्ध : १५ फेब्रुवारी

* हरकती व सूचना दाखल करणे : १५ ते २२ फेब्रुवारी

* प्रभागनिहाय अंतिम मतदार यादी प्रसिद्ध : १ मार्च

* मतदान केंद्रनिहाय यादी प्रसिद्ध : ८ मार्च