श्री कॉलनीत पोलीस बंदोबस्तात उभारले टॉवर

महापालिका प्रभाग क्र. ३६ बेनोडा-भीमटेकडी अंतर्गत येणाऱ्या श्री कॉलनी येथे पोलीस बंदोबस्तात मोबाईल टॉवर ...

नागरिकांनी काम बंद पाडले : महापौरांनी घेतली दखल
अमरावती : महापालिका प्रभाग क्र. ३६ बेनोडा-भीमटेकडी अंतर्गत येणाऱ्या श्री कॉलनी येथे पोलीस बंदोबस्तात मोबाईल टॉवर उभारणी सुरू असताना परिसरातील नागरिकांनी या प्रकाराला जोरदार विरोध करीत टॉवर उभारणीचे काम थांबविले. हा गंभीर प्रकार रोखण्यासाठी रविवारी या भागाचे नगरसेवक अविनाश मार्डीकर, ममता आवारे यांनी पुढाकार घेतला.
दरम्यान, नागरिकांनी महापौर चरणजितकौर नंदा यांना निवेदन सादर करुन हे मोबाईल टॉवर हटविण्याची मागणी केली. श्री कॉलनीत युनिटी नामक कंपनीचे मोबाईल टॉवर उभारणीचे काम शुक्रवारी रात्रीपासून सुरु झाले. अचानकच टॉवर उभारणी सुरु झाल्याने नागरिकांमध्ये खळबळ उडाली आहे. टॉवर उभारणीपूर्वी परिसरातील नागरिकांच्या हरकती नोंदविण्यात आल्या नाहीत. उलटपक्षी थेट पोलीस बंदोबस्तात टॉवर उभारणीचे काम सुरु झाल्याने काही तरी घोटाळा असल्याची शंका नागरिकांना आली. काही जागरूक नागरिकांनी या भागाचे नगरसेवक अविनाश मार्डीकर, ममता आवारे यांच्याशी संपर्क साधून मोबाईल टॉवर उभारणीसंदर्भात माहिती दिली व काम बंद पाडले.