अमरावती : भरधाव ट्रकच्या धडकेत दुचाकीवरील तिघांचा मृत्यू झाला. हा अपघात ६ मार्च रोजी सायंकाळी ७.२५ च्या सुमारास परतवाडा-चांदूरबाजार मार्गावरील वाय पॉईंटवर घडला. घटनास्थळी परतवाडा व चांदूरबाजार पोलीस पोहोचले. ताेपर्यंत ट्रकचालकाने ट्रकसह पोबारा केला.
शेख समीर शेख हबीब (४०), लोकेश पप्पू सलामे (२२) व शेख तनवीर शेख सत्तार (३५), तिघेही रा. कुरळ पुर्णा, ता. चांदूरबाजार, जि. अमरावती अशी मृतांची नावे आहेत. कुरळपूर्णा येथील बाजारात मजुरांचे पैसे वाटप करून ते तिघेही परतवाड्याकडे एकाच दुचाकीने निघाले होते. परतवाडा रोडवरील वाय पॉईंटजवळ वैभव केळकर यांच्या शेताजवळ एमपी-२०/एचबी ३६१२ या ट्रकने त्यांच्या दुचाकीला समोरासमोर जबर धडक दिली. यात दोघांचा घटनास्थळी मृत्यू झाला.
अपघाताची माहिती मिळताच परतवाडा - चांदूरबाजार पाेलीस घटनास्थळी दाखल झाले. त्यांनी नागरिकांच्या मदतीने जखमीला हाॅस्पिटलसाठी रवाना केले. मात्र तेथे उपचारादरम्यान मृत्यू झाला. अपघात हाेताच ट्रकचालकाने तेथून पळ काढला. याप्रकरणी रात्री उशिरापर्यंत गुन्हा दाखल करण्याची प्रक्रिया सुरू हाेती.