३९ दिवसानंतरही तीन अंकी रुग्ण कायम, सोमवारी पुन्हा २३५ पॉझिटिव्ह

अमरावती : नवीन वर्षात जानेवारीपासून कोरोना संक्रमित रुग्ण तीन अंकी आढळून येण्याचा आलेख कायम आहे. विशेषत: शहरी भागातच पॉझिटिव्ह रुग्ण मिळत असल्याने आरोग्य यंत्रणांनी आता नव्याने उपाययोजनांना प्रारंभ केला आहे. सोमवारपासून मास्क न वापरणे, शारीरिक अंतर न ठेवणे आणि सार्वजनिक स्थळी थुंकणे याविरूद्ध धडक मोहीम उघडल्याची कार्यवाही हा त्याचाच एक भाग मानला जात आहे.

१ जानेवारी ते ८ फेब्रुवारी या दरम्यान ३९ दिवस ओलांडले असले तरी कोरोना संक्रमित रूग्णांची आकडेवारी ही तीन अंकी कायम आहे. तर, फेब्रुवारीपासून रूग्ण संख्या वाढीला वेग आला आहे. जिल्ह्यातील संक्रमितांचा मृत्यूदर हा इतर जिल्ह्यांपेक्षा अधिक असल्याबाबतची चिंता रविवारी केंद्रीय आराेग्य पथकाने व्यक्त केली. जिल्हाधिकारी शैलेश नवाल यांच्या आदेशानुसार चार उपजिल्हाधिकाऱ्यांच्या मार्गदर्शनात २० पथके नेमण्यात आली आहेत. महापालिका प्रशासनाने पाचही झोन अंतर्गत कारोना त्रिसूत्रीचे पालन करण्यासाठी स्वतंत्र पथक नियुक्त केले आहे. एकुणच कोरोनाची आकडेवारी बघता स्थिती धक्कादायक मानली जात आहे. सोमवारी २३५ संक्रमित आढळले असून, ३०७ रूग्ण दाखल आहेत. तर ८९ रूग्ण बरे होऊन घरी परतले आहे. गृह विलगिकरणात ग्रामीण भागात २४७ तर, शहरी भागात ५४ रूग्ण आहेत. उपचारादरम्यान सोमवारी एकाचा मृत्यू झाला असृून, आतापर्यंत ४२४ जणांना प्राण गमवावे लागले आहे.

०००००००००००००००००००००

फेब्रुवारीत आठ दिवसांत संक्रमित रूग्ण

१ फेब्रुवारी------------------ ९२

२ फेब्रुवारी------------------ ११८

३ फेब्रुवारी------------------१७९

४ फेब्रुवारी------------------१५८

५ फेब्रुवारी------------------२३३

६ फेब्रुवारी------------------ २७०

७ फेब्रुवारी------------------ १९२

८ फेब्रुवारी------------------ २३५

--------------

महापालिका सहाय्यक आयुक्तांवर विशेष जबाबदारी

अमरावती महानगरात कोरोना संक्रमणाचा वेग वाढत असल्याच्या पार्श्वभूमीवर पाचही झोनच्या सहायक आयुक्तांवर कोरोना नियंत्रणासाठी विशेष जबाबदारी सोपविली जाणार आहे. महापालिका आयुक्त प्रशांत रोडे यांनी त्यानुसार तयारी चालविली आहे. मास्कचा वापर, शारीरिक अंतर, हॅन्डवॉश करणे, गर्दी टाळणे, सर्दी, खोकला, ताप असल्यास तपासणी करून घेणे आदीबाबत नागरिकांना मार्गदर्शन केले जाणार आहे. कोरोना नियमावलींचे पालन न करणाऱ्यांवर कारवाईसाठी सहायक आयुक्तांना पुढाकार घ्यावा लागणार आहे.