नागरिकांची फसवणूक करणाऱ्यांवर कठोर कारवाई

अमरावती : उपअधीक्षक भूमी अभिलेख अंतर्गत येणाऱ्या जिल्ह्यातील नझूल शीट प्लॉटबाबत होणारे फेरफार, फेरफार झाल्यानंतर मिळकत पत्रिका तयार करणे, मिळकत पत्रिका वितरण करणे, मिळकत पत्रिकेकरिता आकारण्यात येत असलेले शासकीय शुल्क, फेरफार करताना संबंधित पक्षकारांना कोणतीही सूचना न देता फेरफार प्रमाणित करणे आदीबाबत तक्रारी प्रशासनाला प्राप्त अशा नागरिकांवर कठोर कारवाईचे आदेश जिल्हाधिकाऱ्यांनी दिले आहेत.

बनावट आखीव पत्रिका तयार करून वितरित करणे, तसेच आकारण्यात येणारे शुल्क चलानद्वारे शासकीय खजिन्यात जमा न करता अपहार करणे आणि नियमबाह्य कामकाज होत असल्याबाबत अनेक तक्रारी प्रशासनाला प्राप्त झाल्या आहेत. अशा प्रकरणांपासून जनतेची फसवणूक टाळण्यासाठी मालमत्ता मिळकत पत्रिकेचे वितरण ऑनलाईन पध्दतीने महाभूलेख या संकेतस्थळावरून करण्यात यावे, असे स्पष्ट निर्देश जिल्हाधिकारी शैलेश नवाल तथा पदसिध्द भूमी अभिलेख उपसंचालक शैलेश नवाल यांनी दिले आहे.

उपअधीक्षक भूमी अभिलेख अमरावती यांनी मालमत्ता मिळकत पत्रिकेचे वाटप हे सर्व ऑनलॉईन पध्दतीने महाभुलेख संकेतस्थळवरुन करावे. ज्या मिळकत पत्रिका ऑनलॉईन झालेल्या नसतील अशा मिळकत पत्रिकाची नागरीकांकडून मागणी झाल्यास उपअधिक्षक भूमी अभिलेख कार्यालय यांनी तात्काळ नियमानुसार मिळकत पत्रिका ऑनलॉईन करुन महाभुलेख संकेतस्थळावरुन निर्गमित करावे. कोणत्याही परिस्थितीत ऑफलॉईन मिळकत पत्रिका वितरीत करण्यात येऊ नये, अशा सूचना जिल्हाधिकाऱ्यांनी संबंधित विभागाला दिल्या.

उपअधिक्षक भूमी अभिलेख कार्यालयामधुन ज्या मिळकत पत्रिका ऑनलाईन झालेली नसेल, अशा बाबतीत विशेष परिस्थितीमध्ये ऑफलाईन मिळकत पत्रिका वितरीत करणे आवश्यक असल्यास मूळ मिळकत पत्रिकेची छायांकीत साक्षांकीत प्रत सेतुमधून वरीलप्रमाणे शुल्कचा भरणा केल्यावर संबंधितांना वितरीत करावे. तसेच याबाबतची स्वतंत्र नोंदवही जतन करुन ठेवावी.

अद्यापपर्यंत ऑनलाईन न झालेल्या मिळकत पत्रिका १५ ऑगस्टपूर्वी ऑनलाईन करण्याची प्रक्रिया पूर्ण करुन तसा कार्यपूर्ती अहवाल सादर करण्याचे निर्देशही जिल्हाधिकाऱ्यांनी दिले आहे.

बॉक्स

नागरिकांची मिळखत संकेतस्थळावर

नागरिकांना मिळकत पत्रिका ही संकेतस्थळावर उपलब्ध होणार असून ऑनलाईन चलनाव्दारे शासकीय शुल्क भरल्यावर पत्रिका प्राप्त होईल. महानगरपालिका क्षेत्राकरीता १३५ रुपये, अ, ब, क वर्ग नगरपालीका, नगरपंचायत क्षेत्राकरीता ९० रुपये तर ग्रामीण क्षेत्रासाठी ४५ रुपये इतके शासकीय शुल्क भरून मिळकत पत्रिका मिळण्याची सोय उपलब्ध करुन देण्यात आलेली आहे.

बॉक्स

नियमबाह्य कामासाठी या अधिकाऱ्यांवर कारवाई

उपअधीक्षक भूमी अभिलेख कार्यालयातील कर्मचारी स्वप्नील उंबरकर व योगेश शिरभाते यांच्यावर फौजदारी कार्यवाही करुन गुन्हा दाखल करण्यात आला आहे. स्वप्नील उंबरकर व योगेश शिरभाते तसेच मुख्य सहाय्यक अविनाश दशरथकर यांचे निलंबन करण्यात आले आहे. तसेच शिरस्तेदार, अर्चना चव्हाण यांची विभागीय चौकशी तर भूमापक जे. एस. दुबळे यांच्यावर निलंबनाची कार्यवाही प्रस्तावित केलेली आहे.

बॉक्स

मिळकत पत्रिकेच्या प्रत्येक पानाकरिता दोन रुपये आकारणी

मिळकत पत्रिका ही सेतु केंद्र आपले सरकार सेवा केंद्र मधुन ऑनलॉईन पध्दतीने महाभुलेख संकेतस्थळवरुन वितरित करण्यात येईल. मिळकत पत्रिकेसाठी उपरोक्तप्रमाणे पत्रिका शुल्क व सेतु सुविधा शुल्क २५ रुपये प्रमाणे (मिळकत पत्रिकाचे एकूण ५ पानांपर्यंत) आकारण्यात येईल. व त्यापुढील प्रत्येक पानाकरिता दोन रुपये आकारून नागरिकांना पत्रिका उपलब्ध करून देण्यात याव्यात, असे निर्देश आहेत.