आमदारांच्या ठिय्याने रस्ता बांधणीला सुरुवात

वनविभागाचे अधिकारी आल्यापावली परतले: पोलिसांचा बंदीबस्त

परतवाडा : रस्ता मंजूर होऊनसुद्धा वनाधिकारी रस्त्याचे काम केल्यास गुन्हे दाखल करण्याची धमकी देत असल्याचे पाहून शनिवारी मेळघाटचे आमदार राजकुमार पटेल यांनी खुद्द जंगलात खुर्ची टाकून दिवसभर ठिय्या दिला. परिणामी, सार्वजनिक बांधकाम विभागाला परतवाडा धारणी इंदूर या आंतरराज्यीय मार्गावरील १६ किलोमीटर मंजूर रस्त्याच्या डांबरीकरणाला सुरुवात झाली. पोलिसांचा बंदोबस्तसुद्धा तैनात होता. दुसरीकडे रस्त्याचे काम बंद करण्यासाठी दोन वेळा आलेला वनाधिकाऱ्यांचा ताफा आल्यापावली परतला.

मेळघाट व्याघ्र प्रकल्प आणि वनविभागाच्या जाचक अटी-शर्तींमुळे दोन वर्षांपासून रस्त्यांची कामे रखडली आहेत. वारंवार परवानगी व विनंती पत्र देऊनसुद्धा वनाधिकारी गुन्हे दाखल करण्याचे धमक्या देत असल्याने मेळघाटातील रस्ते पूर्णत: खड्डेमय झाले आहेत. त्यावर कळस म्हणजे, शासनाने मंजूर केलेला कोट्यवधीचा निधी परत जाण्याची भीती वर्तविला जात आहे. या सर्व रस्त्यांची मालकी सातबारावर सार्वजनिक बांधकाम विभागाकडे आहे. वारंवार सांगूनही रस्त्याच्या कामात अडथळा येत असल्याने मेळघाट आमदार राजकुमार पटेल यांनी शनिवारी खुद्द रस्त्यावर टेबल-खुर्ची टाकून पहिल्या टप्प्यात मंजूर असलेल्या लवादा ते बोरी या १६ किलोमीटरच्या रस्ता कामाला सुरुवात करून घेतली. दिवसभरात काही किलोमीटरचा रस्ता शनिवारी एका बाजूने तयार झाला. धारणी ते परतवाडा मुख्य रस्ता बांधकामावेळी धारणीचे उपअभियंता रा.रा माळवे, शाखा अभियंता नीलेश खडसने, कंत्राटदार हाजी इशाकभाई आदी उपस्थित होते.

-------