चांदूर रेल्वे तालुक्यातील कोरोनायोद्ध्यांचा महसूल विभागातर्फे सत्कार

उपविभागीय अधिकाऱ्यांच्या हस्ते शासकीय ध्वजारोहण, जिल्हा परिषद शाळेच्या प्रांगणात

सोहळा

चांदूर रेल्वे : शहरातील प्रजासत्ताक दिनी शासकीय ध्वजारोहण उपविभागीय अधिकारी इब्राहिम चौधरी यांच्या हस्ते जिल्हा परिषद शाळेच्या प्रांगणात पार पडला. याप्रसंगी कोरोनायोद्ध्यांचा सत्कार महसूल विभागाच्यावतीने करण्यात आला.

उपविभागीय अधिकारी इब्राहीम चौधरी यांच्या आगमनानंतर सर्वप्रथम संविधान उद्देशिकेचे सामूहिक वाचन करण्यात आले. ध्वजारोहणानंतर पोलीस पथक व अशोक महाविद्यालयाच्या एनसीसी पथकाने पथसंचलन केले. यावेळी तहसीलदार राजेंद्र इंगळे, ठाणेदार मगन मेहते, नगराध्यक्ष शिट्टू सूर्यवंशी, उपाध्यक्ष देवानंद खुणे, पंचायत समिती सभापती सरिता देशमुख, माजी सुभेदार जगन्नाथ गवई, पंचायत समिती सदस्य अमोल होले, श्रद्धा वऱ्हाडे यांसह अनेकांची उपस्थिती होती.

लॉकडाऊनच्या काळात भिकारी व वेडसर लोकांना जेवणाचे डबे पुरविणारे साहस जनहितकारी बहुउद्देशीय संस्थेचे अध्यक्ष चेतन भोले, गरजूंना जेवण पुरविणारे पुरुषोत्तम भुते, जय हिंद क्रीडा मंडळाचे सदस्य मिथीलेश विश्वकर्मा, गरजूंना अन्नधान्य किट वाटप करणारे जगदीश काशीकर, दारासिंह राठोड, परीक्षित जगताप, विनय कडू, माजी सुभेदार जगन्नाथ गवई, मोहम्मद मतीन इकबाल लाखानी, दुचाकीने फिरून चहा व पाणी वाटप करणारे विवेक ऊर्फ राजू चर्जन, शासकीय कार्यालयात सॅनिटायझर स्प्रे-पंप देणारे साजिद जानवानी, परराज्यातील प्रवाशांकडून योग्य तेच भाडे घेऊन त्यांना सोडणारे अविनाश कैलकार, अडकलेल्या मजुरांना कपडे वाटप करणारे सुनील भूत, प्रकाश मोटवानी, चांगल्या प्रकारे जनजागृती करून लोकांना लोकशिक्षण देणारे अखिल भारतीय ग्रामीण पत्रकार संघ व स्वाभिमानी पत्रकार संघ, विविध शासकीय कार्यालयातील या कालावधीत केलेल्या सेवेबाबत नगर परिषदेचे सफाई कर्मचारी विजय कनोजे, पोलीस उपनिरीक्षक गणेश मुपडे, मंडळ अधिकारी सतीश गोसावी, मागासवर्गीय मुलांचे शासकीय वसतिगृह येथील कर्मचारी शेखर देशमुख यांचा कोरोनायोद्धा म्हणून प्रमाणपत्र देऊन सत्कार करण्यात आला.