धाडसाला सलाम! अमरावतीच्या पोलिस अंमलदाराने ११ फूट पाण्याखाली १ मिनिट २२ सेकंद फडकवला तिरंगा

Republic Day 2026: अमरावती पोलीस अंमलदार प्रवीण आखरे यांचा थरारक पराक्रम

अमरावती: महाराष्ट्र पोलीस दलात धाडस, शौर्य आणि कर्तृत्वाची परंपरा जपणारे अनेक अधिकारी व अंमलदार आहेत. त्यात अमरावती शहर पोलीस आयुक्तालयातील पोलीस अंमलदार प्रवीण दादाराव आखरे यांनी आपल्या असामान्य साहसाने पुन्हा एकदा पोलीस दलाचा मान उंचावला आहे. ७७ व्या प्रजासत्ताक दिनाच्या पावन पर्वावर, प्रवीण आखरे यांनी कोणत्याही ऑक्सिजन उपकरणाचा वापर न करता, तब्बल ११ फूट खोल पाण्याखाली १ मिनिट २२ सेकंद श्वास रोखून तिरंगा ध्वज फडकावला. हा थरारक आणि प्रेरणादायी उपक्रम अमरावती पोलीस जलतरण केंद्रात पार पडला.

हा उपक्रम पोलीस आयुक्त राकेश ओला यांच्या मार्गदर्शनाखाली तसेच पोलीस उपायुक्त गणेश शिंदे, रमेश धुमाळ आणि शाम घुगे यांच्या उपस्थितीत व मार्गदर्शनात पार पडला. यावेळी आखरे यांनी हातात देशाचा तिरंगा अभिमानाने धरत “हर घर तिरंगा” या संकल्पनेला जलतरण केंद्राच्या पाण्यातून अनोखा साकार दिला.

कोण आहेत प्रवीण आखरे?

प्रवीण आखरे हे अमरावती पोलीस आयुक्तालयातील जीव रक्षक तसेच शोध व बचाव पथकात कार्यरत असून, याआधीही त्यांनी अनेक साहसी आणि विक्रमांची नोंद असलेले उपक्रम केले आहेत. पाण्याखाली व पाण्यावर योगासने सादर करत त्यांनी इंडिया बुक ऑफ रेकॉर्ड्स व एशिया बुक ऑफ रेकॉर्ड्समध्ये आपले नाव नोंदवले आहे. तसेच पाण्यात सायकल चालवणे, स्केटिंग करत तिरंगा फडकावणे, अशा अभिनव उपक्रमांतून त्यांनी अमरावती पोलीस मुख्यालयाचा गौरव वाढवला आहे.

या धाडसी उपक्रमाची माहिती मिळताच, अमरावतीच्या “लेडी गव्हर्नर” म्हणून ओळखल्या जाणाऱ्या कमलाताई गवई यांनी सोमवारी अचानक पोलीस मुख्यालयाच्या जलतरण केंद्राला भेट देत प्रवीण आखरे यांचे स्वतः उपस्थित राहून स्वागत व अभिनंदन केले. प्रजासत्ताक दिनानिमित्त देशभक्ती, शौर्य आणि सेवाभाव यांचा संगम साधणारा हा उपक्रम सध्या सर्वत्र प्रशंसेचा विषय ठरत आहे.