अमरावती : अवैध सावकारी संदर्भात प्राप्त तक्रारीच्या आधारे सहकार विभागाच्या सात पथकाने शहरात मंगळवारी सात ठिकाणी धाडसत्र राबविले. यामध्ये माजी नगरसेवक श्रीचंद तेजवानी यांचे दोन दुकान व घराचा समावेश आहे. याशिवाय अन्य चार ठिकाणी छापे मारून अवैध सावकारी संदर्भात कागदपत्रे जप्त केली आहेत.
पथकाद्वारा तेजवानी यांच्या दोन मोबाइल शॉपी आणि रामपुरी कॅम्प येथील घर, कांचन पंकज बजोरिया (जेल रोड), किशोर मोहनलाल छाबडा (कंवरनगर), सुनील सुरेश देशमुख (चपराशीपुरा) व प्रमोेद मधुकर क्षीरे (विजय कॉलनी) या ठिकाणी पथकांनी धाडसत्र राबविले. यामध्ये कोरे धनादेश, मुद्रांक, करारनामा यासह अन्य कागदपत्र सील करण्यात आली. राजेश भुयार (सहाय्यक निबंधक, मोर्शी ), गजानन डावरे (धामणगाव रेल्वे), अच्युत उल्हे (अमरावती), कीर्ती धामणे(तिवसा), कल्पना धोपे (वरुड), राजेश यादव (अंजनगाव) व किशोर बलिंगे (दर्यापूर) या प्रमुख प्रमुखांनी ही कारवाई केल्याचे सहकार अधिकारी सुधीर मानकर यांनी सांगितले.
सहकार विभागाचे माहितीनुसार महाराष्ट्र सावकारी (नियमन)अधिनियम २०१४ मदील तरतुदीनुसार जिल्हा उपनिबंधक शंकर कुंभार यांनी प्राप्त तक्रारीच्या आधारे सात सहाय्यक निबंधकांचे सात पथके तयार केली. प्रत्येक पथकात चार कर्मचाऱ्यांचा समावेश होता. या पथकांनी शहरातील राजापेठ, कोतवाली, गाडगेनगर, खोलापुरी गेट व फ्रेझरपूरा ठाण्या अंतर्गत सात ठिकाणी हे धाडसत्र राबविले.
एकाही जवळ सावकारीचा परवाना नाही
सहकार विभागाने मंगळवारी केलेल्या छापेमारीतील एकाही व्यक्तींकडे सावकारीचा अधिकृत परवाना नाही. या कारवाईदरम्यान मिळालेली कागदपत्रे सील करण्यात आली आहेत. यानंतर सुनावणी होईल. यामध्ये संबंधित व्यक्ती अवैध सावकारी करीत असल्याचे सिद्ध झाल्यास त्यांच्यावर कारवाई केल्या जाणार आहे.
आतापर्यंत ६१ छापे २९ एफआयआर
महाराष्ट्र सावकारी अधिनियम २०१४ च्या अंमलबजावणी पासून जिल्ह्यात अवैध सावकारी विरोधात ६१ ठिकाणी धाडसत्र राबविण्यात आलेले आहे. यामध्ये २९ एफआयआरमध्ये ३४ जणांविरुद्ध कारवाई करण्यात आलेली आहे. या शिवाय काही प्रकरणात चौकशी सुरु असल्याचे सहकार विभागाने सांगितले.
सात पथकांद्वारा सात ठिकाणी कारवाई करण्यात आली. यामध्ये काही धनादेश, मुद्रांक आदी मिळाले आहेत. नागरिकांनी निर्भिडपणे, पुराव्यासह तक्रार करावी, त्यावर कारवाई करण्यात येईल.
- शंकर कुंभार, जिल्हा उपनिबंधक