पीएसआय सासऱ्याने केला जावयाचा खून

मुलीच्या प्रेमविवाहाला विरोध करणाऱ्या पीएसआय सासऱ्याने जावयाची गळा दाबून हत्या केली व मृतदेह जाळला.

सचिन सिमोलियाची हत्याच : प्रेमविवाह होता नापसंत
अमरावती : मुलीच्या प्रेमविवाहाला विरोध करणाऱ्या पीएसआय सासऱ्याने जावयाची गळा दाबून हत्या केली व मृतदेह जाळला. ही धक्कादायक घटना सोमवारी उघडकीस आली. सचिन सिमोलिया असे मृताचे, तर तुकाराम ढोके, असे आरोपी सासऱ्याचे नाव आहे.
सचिन बेपत्ता झाल्याची तक्रार फे्रजरपुरा पोलीस ठाण्यात चार महिन्यांपूर्वी नोंदविण्यात आली होती. या घटनेचे गूढ आता बाहेर आले असून मुलीच्या माहेरच्या मंडळीनीच सचिनची हत्या केल्याचे पोलीस चौकशी उघड झाले आहे. ‘सैराट’ या बहुचर्चित चित्रपटाशी साधर्म्य साधणारी ही घटना अंगाचा थरकाप उडविणारी आहे. वाशीम जिल्ह्यातील मानोरा पोलीस ठाण्याच्या हद्दीत हा भयंकर प्रकार घडला. याप्रकरणी मानोरा पोलिसांनी पाच जणांविरूद्ध हत्येचा गुन्हा नोंदविला आहे.
पोलीस सूत्रांनुसार, येथील संजय गांधी नगरातील रहिवासी सचिन सिमोलीया या तरूणाने कारंजा लाड येथील रहिवासी शिवानी तुकाराम ढोके हिच्याशी १ एप्रिल २०१६ रोजी आर्य समाज मंदिरात प्रेमविवाह केला. या विवाहाला मुलीचे वडील आसेगाव ठाण्याचे पोलीस उपनिरीक्षक तुकाराम ढोके यांचा विरोध होता. कुटुंबाच्या विरोधात जाऊन दोघांचाही संसार सुरू असताना २५ मे रोजीला शिवानीला फोन आला आणि तिला माहेरी बोलविण्यात आले. त्यामुळे सचिन व शिवानी हे दोघेही कारंजा लाड येथे गेले. मात्र, तेव्हापासून सचिन पुन्हा घरी परतला नाही. त्यामुळे ३१ मे रोजी सचिनच्या कुटंबीयांनी फे्रजरपुरा पोलीस ठाण्यात सचिन बेपत्ता झाल्याची तक्रार नोंदविली. याप्रकरणात पोलिसांची भूमिका संशयास्पद असल्याचा आरोप सचिनची आई सविता सिमोलिया यांनी केला होता. चार महिने उलटूनही सचिनचा शोध लागला नव्हता. त्यामुळे त्याच्या आईने अनेकदा पोलिसांचे उंबरठे झिजविले.

मृतदेहाचे अवशेष प्रयोगशाळेत
अमरावती : त्या स्वत: वाशिम येथे ढोके यांच्या घरी सचिनबद्दल विचारपूस करण्याकरिता जाऊन आल्या. मात्र, तरीही सचिनचा पत्ता लागला नाही. त्यामुळे हतबल झालेल्या सचिनच्या आईने रिपाइंच्या माध्यमातून आंदोलन छेडले. आंदोलनामुळे पोलिसांच्या तपासाला वेग आला. पोलीस उपायुक्त शशिकुमार मिना यांनी या प्रकरणाचा तपास सहायक पोलीस निरीक्षक सतीश इंगळेंकडे सोपविला. त्यांनी सायबर लॅबचे एपीआय कांचन पांडे यांच्या मदतीने सचिनचे मोबाईल लोकेशन घेतले. त्यामध्ये २५ मे रोजी सचिन हा पुसद येथे गेल्याचे आढळून आले. मात्र, त्यानंतर त्याचा मोबाईल बंद आढळून आला. त्याच्या मोबाईलवर सर्वात शेवटी त्याचे सासरे तुकाराम ढोके यांनी संपर्क केल्याची माहिती पोलिसांच्या हाती लागली. त्यानुसार फे्रजरपुरा पोलिसांनी तुकाराम ढोके यांना विचारपूस करण्याकरिता बोलाविण्याचे ठरविले.
याच दरम्यान २५ मे रोजी मानोरा पोलीस ठाण्याच्या हद्दीत अनोखळी युवकाचा जळालेल्या अवस्थेत मृतहेद आढळून आला. त्यासंदर्भात इंगळे यांनी मानोरा ठाण्याचे तपास अधिकारी डाखोरे यांची भेट घेऊन घटनाक्रम जाणून घेतला.
घटनास्थळी मृताजवळ तुटलेले मंगळसूत्र, काही मणी व १ चांदीची बदाम ठप्पा असलेली अंगठी सापडली. त्यामध्ये सचिनने घातलेल्या ब्रासलेटचे मणी असल्याचेही पोलिसांना आढळून आले. मात्र, मृतदेह हा ९० टक्के जळालेल्या अवस्थेत असल्याने त्याची ओळख पटविण्याचे मोठे आव्हान पोलिसांसमोर होते. परिणामी मृतदेहाचे अवशेष फॉरेन्सीक लॅबला तपासणीकरिता पाठविण्यात आले आहे. या संशयावरून पोलिसांनी पोलीस उपनिरीक्षक तुकाराम ढोके व त्यांच्या कुटुंबियांची चौकशी केली असता आरोपी तुकाराम ढोके याने गुन्ह्याची कबुली दिली. मुलीने मनाविरुद्ध लग्न केल्याच्या रागात सचिनची गळा दाबून हत्या केली आणि पऱ्हाटीच्या गंजीवर मृतदेह जाळून टाकल्याचे बयाण तुकाराम ढोके याने पोलिसांना दिले.
या हत्येत तुकाराम ढोकेचा मुलगा तुषार ढोके, भाचा प्रवीण आगलावे यांनी मदत केली. याप्रकाराबाबत शिवानी व पुण्याबाई तुकाराम ढोके यांना माहिती होती. याप्रकरणी मानोरा पोलिसांनी पाच आरोपींविरूद्ध भादंविच्या कलम ३०२, २०१ अन्वये गुन्हा नोंदविला असून तीन आरोपींना अटक केली आहे. या आरोपींना फे्रजरपुरा पोलिसांनी मानोरा पोलिसांच्या स्वाधीन केले आहे.

पोलिसांची यशस्वी कामागिरी
सचिन सिमोलियाचा शोध घेण्याचे आव्हान पोलिसांसमोर होते. या अत्यंत किचकट तपासात पोलीस आयुक्त दत्तात्रय मंडलिक व पोलीस उपायुक्त शशिकुमार मिना यांच्या मार्गदर्शनात पोलीस निरीक्षक प्रमेश आत्राम, गुन्हे शाखेचे पोलीस निरीक्षक अनिल किनगे, सहायक पोलीस निरीक्षक सतीश इंगळे, सायबर सेलचे एपीआय कांचन पांडे, पोलीस कॉन्स्टेबल संग्राम भोजने, मनीष गवळी, सहायक पोलीस उपनिरीक्षक गजानन डोईफोडे, तुकाराम देवकर, निबोरकर यांनी यशस्वी कामगिरी बजावली.

सचिनच्या आईचा पोलीस आयुक्तालयात आक्रोश
सचिन हरविल्याची तक्रार त्याच्या आईने ३१ मे रोजी केली होती. त्यानुसार फे्रजरपुरा पोलिसांनी चौकशी सुरू केली होती. मात्र, चार महिने उलटूनही सचिनचा शोध न लागल्याने त्याच्या आईच्या मनात भीती निर्माण झाली होती. पोलिसांनीच चौकशीत विलंब लावल्याचा आरोप करीत सचिनच्या नातेवाईकांनी आंदोलन छेडले होते. मात्र, सोमवारी सचिनची हत्या झाल्याचे उघड होताच त्याची आई सविता सिमोलिया यांना मोठा धक्का बसला. त्यांनी नातेवाईकांसह पोलीस आयुक्तांकडे धाव घेऊन न्यायाची मागणी केली. यावेळी पोलिसांनी सचिनच्या नातेवाईकांना प्रवेशद्वारासमोरच अडविले असता नातेवाईकांनी पीआय आत्राम यांच्यावर रोष व्यक्त केला. त्यानंतर सचिनच्या मारेकऱ्यांवर कठोर कारवाई करा व पोलीस निरीक्षक प्रमेश आत्राम यांना निलंबित करून गुन्हे नोंदवा, अशी मागणी केली. सीपींनी चौकशी पूर्ण करून कारवाई करण्यात येणार असल्याचे सांगितले