वर्धा येथील युवतीकडून करून घेतला जात होता अमरावतीत वेश्याव्यवसाय

अमरावती : अकोली मार्गावरील खंडेलवाल नगरातील साहू ले-आऊटमधील देहविक्रयाचा अड्डा शहर गुन्हे शाखेच्या पथकाने धाड टाकून उद्ध्वस्त केला. या ठिकाणी वर्धा येथील युवतीला अमरावतीत आणून तिच्याकडून वेश्याव्यवसाय करून घेतला जात होता. तिच्यासोबत अमरावती येथील एक युवतीसुद्धा वेश्याव्यवसाय करीत होती, असे पोलिसांच्या तपासात उघडकीस आले आहे.

वर्धा येथील २२, तर अमरावती येथील २१ वर्षीय युवतींना पोलिसांनी ताब्यात घेतल्यानंतर त्यांना नागपूर येथील पुनर्वसन व सुधार केंद्रात पाठविले. त्यांना तेथे २१ दिवसांपर्यंत ठेवण्यात येणार आहे. वर्धा येथील एका महिला हा कुंटणखाना चालवित होती. तिला खेर्डा (ता. कारंजा लाड) येथील आरोपी युवक साहाय्य करीत होता. सदर युवक हा ग्राहक शोधण्यासाठी मदत करायचा. कुंटणखाना चालविण्याकरिता साहू ले-आऊटमध्ये एक महिन्यापूर्वी वर्धा येथील आरोेपी महिलेने भाड्याने रूम घेतली. त्यानंतर तिच्या संपर्कात आलेल्या वर्धा व अमरावती येथील तरुणींकडून वेश्याव्यवसाय करून घेतला जात होता. दिवसभर किंवा रात्री या ठिकाणी कार व दुचाकीने वेगवेगळे ग्राहक यायला लागले. हा प्रकार परिसरातील नागरिकांच्या लक्षात आला. त्यानंतर नागरिकांनी पोलिसांकडे तक्रार केली होती. ग्राहक येताना आजूबाजूच्या महिलांकडेसुद्धा वाईट नजरेने पाहिले जात होते. यामुळे परिसरातील महिला त्रस्त होत्या. या विषयी तक्रार त्यांनी पोलीस आयुक्त आरती सिंह यांच्याकडे केल्यानंतर त्यांनी शहर गुन्हे शाखेच्या पथकाला कारवाईचे आदेश दिले. गुन्हे शाखेचे पोलीस निरीक्षक कैलाश पुंडकर यांच्या मार्गदर्शनाखाली पोलिसांनी सापळा रचून दोन बनावट ग्राहक तयार केले. त्यांना पाठविल्यानंतर पोलिसांना खात्री पटली. त्यानंतर वर्धा येथील कुंटणखाना चालविणारी मुख्य महिला व तिला मदत करणाऱ्या एका युवकाला अटक केली. येथे नको त्या अवस्थेत सापडलेल्या दोन तरुणींनाही ताब्यात घेण्यात आले.