कोळशी नियंत्रणासाठी कीटकनाशके

संत्रा पिकावरील काळी, पांढरी माशी (कोळशी) नियंत्रणासाठी कृषी विभागाद्वारा ५० टक्के अनुदानावर कीटकनाशकांचे वितरण करण्यात येणार आहे.

संत्रा पीक संरक्षण योजना : ५० टक्के अनुदानावर वाटप, अडीच हजार हेक्टरला संरक्षण
अमरावती : संत्रा पिकावरील काळी, पांढरी माशी (कोळशी) नियंत्रणासाठी कृषी विभागाद्वारा ५० टक्के अनुदानावर कीटकनाशकांचे वितरण करण्यात येणार आहे. जिल्हा नियोजन विकास मंडळ पुरस्कृत पीक संरक्षण योजना २०१५-१६ अंतर्गत हा उपक्रम जिल्ह्यात राबविण्यात येणार असल्याचे जिल्हा परिषदेचे कृषी विकास अधिकारी उदय काथोडे यांनी शनिवारी सांगितले.
महाराष्ट्र कृषी उद्योग विकास महामंडळामार्फत उत्पादित कीटकनाशके व बुरशीनाशके कृषी आयुक्तालयाने शिफारस केलेल्या दराने पुरवठा करण्यात येत असतात. जिल्हा नियोजन समितीकडून मंजूर नियतव्ययानुसार ही योजना राबविण्यात येते.
जिल्ह्यातील बाधित २ हजार ४९१ हेक्टर क्षेत्रामधील व संत्रावरील काळी व पांढरी माशी नियंत्रणासाठी एकूण ६ फवारणीकरिता मोनोक्रोट्रोफॉस व डायमेथोएट या कीटकनाशकाची पंचायत समिती स्तरावरून ५० टक्के अनुदानावर जिल्ह्यात योजना राबविण्यात येणार आहे.
मोनोक्रोटोफॉस हे १, ३ व ५ व्या फवारणीसाठी २.१० लिटर प्रतिहेक्टर ५० टक्के अनुदानावर २०२ रूपये प्रमाणे ५ हजार २३१ लिटर वितरित करण्यात येणार आहे.
डायमेथोएट ३० ईसी २, ४ व ६ व्या फवारणीसाठी २.४७५ लिटर प्रतिहेक्टर ५० टक्के अनुदानात १५२ रूपये प्रति लिटर याप्रमाणे ६ हजार १६५ लिटर वाटप करण्यात येणार आहे. (प्रतिनिधी)