अमरावती : उद्यानात खेळायला आलेल्या अल्पवयीन मुलींना जवळ बसवून त्यांना पॉर्न व्हिडीओ दाखवून त्यांच्याशी अश्लील कृत्य करणाऱ्या विकृतास बेदम चोप देण्यात आला. दोन महिलांनी त्याला पकडून पोलिसांच्या स्वाधीन केले. ३१ मे रोजी दुपारी ४:३० च्या सुमारास गाडगेनगर पोलिस ठाण्याच्या हद्दीतील एका उद्यानात तो अश्लाघ्य प्रकार घडला.
याप्रकरणी, गाडगेनगर पोलिसांनी आरोपी मनोज मोहन मेश्राम (४५, रा. उपराई, ता. दर्यापूर) याच्याविरुद्ध विनयभंग व पोक्साेअन्वये गुन्हा दाखल केला. त्याला तातडीने अटक केल्याची माहिती गाडगेनगरचे ठाणेदार आसाराम चोरमले यांनी ‘लोकमत’ला दिली. या घटनेवरून उद्यानेही मुलींसाठी असुरक्षित बनल्याचे वास्तव उघड झाले आहे. गाडगेनगर पोलिस ठाण्याच्या हद्दीत राहणाऱ्या एका महिलेच्या घरी तिच्या बहिणीच्या दोन अल्पवयीन मुली पाहुणपणाने आल्या होत्या. दरम्यान, त्यांनी मावशीकडे गार्डनमध्ये खेळायला जाण्याचा आग्रह धरला.
शुक्रवार, २६ मे रोजी सायंकाळी पाचच्या सुमारास त्या दोन्ही अल्पवयीन मुली गार्डनमध्ये खेळत होत्या. त्यावेळी तेथील एका बेंचवर बसलेल्या आरोपीने त्या दोघींपैकी एकीला जवळ बोलावले. त्याने त्याच्या मोबाइलमधील अश्लील व्हिडीओ त्या मुलीला दाखविला. ती मुलगी बेंचवर बसली असताना त्या विकृताने तिच्यासोबत अश्लील कृत्य करण्याचा प्रयत्न केला. ती बाब त्या मुलींनी मावशीला सांगितली.
मुलींनी ती बाब सांगताच तिच्या मावशीने दोन- तीनदा त्या गार्डनला जाऊन त्या विकृताचा शोध घेतला. मात्र, तो दिसला नाही. दरम्यान, ३१ मे रोजी दुपारी पुन्हा त्या मुली त्याच गार्डनमध्ये गेल्या. तेव्हा तो विकृत त्यांना दिसून आला. त्यामुळे मुलींच्या मावशीसह त्यांची आईदेखील लगबगीने तेथे पोहोचल्या. गार्डनच्या गेटवरच दोन्ही मुली मायमावशीकडे धावल्या. गार्डनमध्ये असलेल्या त्या विकृताकडे अंगुलीनिर्देश करत शुक्रवारी अश्लील कृत्य करणारा हाच तो, असे त्यांना सांगितले.
...अन् तो पळू लागला
मुलींना आपल्याबाबत महिलांना काहीतरी सांगितले, असे ध्यानात येताच त्या विकृताने तेथून पळ काढण्याचा प्रयत्न केला. मात्र, काही प्रत्यक्षदर्शी व वाहनधारकांनी त्याला तेथेच पकडले. त्याला चोपदेखील देण्यात आला. त्यानंतर पीडित मुलींच्या आई व मावशीने त्याला पकडून गाडगेनगर पोलिस ठाण्यात आणले. पोलिसी खाक्या बसताच त्याने स्वत:ची ओळख मनोज मेश्राम, अशी सांगितली. त्याच्याविरुद्ध गुन्हा दाखल करण्यात आला.