Amravati News | Latest Amravati News in Marathi | Amravati Local News Updates | ताज्यबातम्या अमरावती | अमरावती समाचार | Amravati Newspaper

लोकमत न्यूज नेटवर्कअमरावती : कोरोनामुळे बंद असलेली मंदिराची दारे गुरुवारी घटस्थापनेच्या शुभमुहूर्तावर उघडली. या अनुषंगाने अमरावती शहरात भक्त गुरुवारी पहाटेपासूनच श्री अंबादेवी व श्री एकवीरादेवी मंदिराच्या महाद्वारासमोर उत्साहात दार उघडण्याच्या प्रतीक्षेत होते. जिल्हाभरातील देवी-देवतांची दीड वर्षांपासून बंद असलेली मंदिरे पुन्हा गजबजली. भाविकांनी याबाबत आनंद व्यक्त केला. जिल्हाधिकारी पवनीत कौर व महापालिका आयुक्त प्रशांत रोडे यांनी पहाटे अंबादेवी मंदिरात दर्शन घेऊन सुरक्षाविषयक बाबींची पाहणी केली. प्रथेनुसार भक्त आधी अंबादेवीचे दर्शन घेतात व नंतर एकवीरा देवीचे दर्शन घेतात. त्यानुसारच दर्शनाची व्यवस्था करण्यात आली आहे, जेणेकरून गर्दी टाळली जाईल. कोरोना नियमांचे पालन करून सॅनिटायझर व थर्मल स्क्रीनिंग करूनच मंदिरात प्रवेश दिला जात आहे. देवीच्या ओटीची व्यवस्था प्रवेशद्वारावर करण्यात आली आहे. अंबादेवी मंदिरात पहाटे ५ वाजता रवींद्र कर्वे व त्यांची पत्नी यांच्या हस्ते घटस्थापना करण्यात आली. या पूजेसाठी योगेश जोशी, विनोद जोशी, राजू जोशी, मिलिंद देवघरे उपस्थित होते. एकवीरादेवी मंदिरातील घटस्थापना राजेद्र डंबे व पत्नी यांच्या हस्ते पार पडली. यावेळी पूजेसाठी श्रीपाद जोशी, नरहरी पुरानिक, श्रीहरी पांडे, दीपक पाठक उपस्थित होते.अंबादेवी मंदिर सकाळी ६ ते रात्री ८.३० या वेळेत खुले राहणार आहे. दुपारी १२ ते १२:३० या वेळेत मंदिर सॅनिटाईझ करण्यासाठी बंद राहील. यावेळी मंदिरात प्रवेश दिला जाणार नाही. - विलास मराठे विश्वस्त, अंबादेवी मंदिर ट्रस्ट.मंदिर उघडण्यापूर्वी भाविकांची रांग होती. मंदिर परिसरात गर्दी होऊ नये. म्हणून महिला व पुरुषांची स्वतंत्र रांगेची व्यवस्था करण्यात आली. मंदिर पहाटे ५ ते रात्री १० वाजेपर्यंत खुले राहणार आहे.- चंद्रशेखर कुलकर्णी कोषाध्यक्ष, एकवीरादेवी मंदिरनवरात्रोत्सवात यात्रा नसली तरी येणाऱ्या लोकांच्या सुरक्षेच्या दृष्टीने पोलीस विभागाकडून मोठ्या प्रमाणात बंदोबस्त लावण्यात आला आहे. या परिसरात पोलिसांच्या दोन चौकी आहेत.- डॉ. आरती सिंह पोलीस आयुक्त

Amravati (Marathi News)