Amravati News | Latest Amravati News in Marathi | Amravati Local News Updates | ताज्यबातम्या अमरावती | अमरावती समाचार | Amravati Newspaper

अमरावती : स्थानिक तहसील कार्यालयातील संजय गांधी निराधार योजनेचे निराधारांचे मंजूर प्रस्ताव गहाळ झाल्यामुळे संतप्त लाभार्थ्यांनी बुधवारी जिल्हा कचेरीवर धडक दिली.संजय गांधी निराधार योजनेंतर्गत निराधारांना शासनाकडून दरमहा अनुदान दिले जाते. यासाठी अमरावती तालुक्यातील पात्र निराधारांनी योजनेचा लाभ मिळावा, याकरिता तहसील कार्यालयाकडे रितसर प्रस्ताव दाखल केले. यापैकी काही प्रस्ताव मंजुरही करण्यात आले.मात्र, संजय गांधी निराधार योजना, श्रावणबाळ योजना आदी योजनांचे मंजूर प्रस्ताव तहसील कार्यालयातून गहाळ झाल्याने लाभार्थ्यांची ओरड सुरू झाली आहे. त्यामुळे या प्रकरणासाठी दोषी संबंधित अधिकाऱ्यांवर तातडीने कारवाई करण्याची मागणी शेकडो निराधार लाभार्थ्यांनी जिल्हाधिकारी किरण गित्ते यांच्याकडे केली आहे.याशिवाय स्थानिक तहसील कार्यालयातील तहसीलदार विनोद पाटील व सहायक लेखाधिकारी संजय गुळधे यांची चौकशी करावी, सर्व लाभार्थ्यांना मंजुरीच्या दिनांकापासून अनुदानाची रक्कम पूर्ण देण्यात यावी, दरमहा १५०० रुपये अनुदान देण्यात यावे, उत्पन्नाची मर्यादा २१ हजाराहून ५० हजार रुपये करण्यात यावी, संजय गांधी निराधार योजनेतील गैरव्यवहाराची सखोल चौकशी करुन दोषींवर कारवाई करावी, अशी मागणी यावेळी निवेदनाद्वारे जिल्हाधिकाऱ्यांकडे केल्या आहेत. या समस्येकडे तत्काळ लक्ष पुरविण्याची मागणी निवेदनातून करण्यात आली.यावेळी शहर काँग्रेस कमिटीचे उपाध्यक्ष बाबाराव गायकवाड, पंजाब गुळधे, सविता तायवाडे, संघदीप वानखडे, सुषमा गुळधे, गोदावरी रौराळे, सहदेव मोटरे, वेणू राऊत, ताईबाई इंगळे, मधुकर कुरळकर, हमिदाबी मजीद खाँ पठाण, बेबी वानखडे, घारड, कोठारे, शकुंतला भालेराव, रमेश कावरे, शारदा मेटांगे, वत्सला बोबडे, अन्नपूर्णा वानखडे यांच्यासह अन्य नागरिक उपस्थित होते.(प्रतिनिधी)

Amravati (Marathi News)