अमरावती : राज्यातील महसूल विभागात तलाठी, अव्वल कारकून, मंडळाधिकारी, लिपिक या गट-क' संवर्गातील अनुसूचित जमातींची एकूण ४६ पदे गायब झाल्याची माहिती उघडकीस आली आहे.
महसूल विभागात गट 'क'ची एकूण मंजूर पदे १९ हजार ६१० आहे. यातील २ हजार १८४ पदे अनुसूचित जमातीसाठी राखीव आहे. अनुसूचित जमातीच्या भरलेल्या पदांची संख्या १ हजार ६७० आहे. यापैकी अनुसूचित जमातींचे जातवैधता सादर करणाऱ्यांची संख्या १ हजार १३७ आहे. जातवैधता प्रमाणपत्र सादर न करणाऱ्यांची संख्या ५३३ आहे. पूर्वीचा ५१४ पदांचा अनुशेष शिल्लक आहे. अनुसूचित जमातीच्या राखीव जागेवर नियुक्त झालेल्या व नंतर मात्र जातवैधता प्रमाणपत्र सादर न केल्यामुळे अधिसंख्य पदावर सेवा वर्ग करण्यात आलेल्या अधिकारी, कर्मचाऱ्यांची संख्या ८० आहे. तर अधिसंख्य पदावर सेवा वर्ग करण्यात आल्यामुळे रिक्त झालेल्या पदांची संख्या ३४ दाखविण्यात आलेली आहे. सर्वोच्च न्यायालयाचा निर्णय ६ जुलै २०१७ची अंमलबजावणी राज्यात होत नसल्याचे वास्तव आहे. महाराष्ट्र लोकसेवा आयोगाच्या कक्षेबाहेर असलेल्या गट 'क'ची १९ पदांची जाहिरात दिल्याचे नमूद आहे. यापैकी सन २०२० व २१ मध्ये १८ पदे भरल्याचे नमूद आहे.