न्यायालयात पक्षकारांकरीता आता ई- सेवा केंद्र

अमरावती: न्यायालयात पक्षकारांकरिता आणखी एक अत्याधुनिक सुविधा निर्माण करून सर्वसामान्यांना न्याय मिळवून देण्याची प्रक्रिया गतिमान करण्यासाठी जिल्हा न्यायालयाच्या तळमजल्यावर ई-सेवा केंद्र स्थापित करण्यात आले आहे.

या ई-सेवा केंद्राचे उद्घाटन सोमवारी प्रमुख जिल्हा व सत्र न्यायाधीश उर्मिला जोशी (फलके) यांच्या हस्ते करण्यात आले. या कार्यक्रमास जिल्हा न्यायालयात कार्यरत सर्व नायिक अधिकारी, जिल्हा वकील संघाचे अध्यक्ष, जिल्हा शासकीय अभियोक्ता व कर्मचारी वृंद यांची उपस्थिती होती. या ई- सेवा केंद्रातील सुविधांचा लाभ घेण्याचे आवाहन प्रमुख जिल्हा व सत्र न्यायाधीश यांनी उद्घाटनाप्रसंगी केले. पक्षकारांना ई-सेवा केंद्रात प्रलंबित न्यायालयीन प्रकरणांची सद्याची स्थिती, पुढील तारीख, प्रमाणित नक्कल प्रति करीता ऑनलाईन अर्ज करण्याची व्यवस्था, दिवाणी प्रकरण दाखल करण्याची सुविधा, ऑनलाईन ई-मुद्रांक खरेदी, सदर सुविधेच्या माध्यमातून तुरुंगात असलेल्या व्यक्तींना त्यांचे नातेवाईकांची भेटी घालून देण्याकरिता ई-मुलाखत सुविधा, राष्ट्रीय विधि सेवा, राज्य विधि सेवा प्राधिकरण व जिल्हा विधि सेवा प्राधिकरणामार्फत समाजातील दुर्बल घटकांना पुरविण्यात येणाऱ्या न्यायविषयक सहाय्याबाबतची माहिती आणि ई-कोर्ट अंतर्गत येणाऱ्या सर्व डिजिटल सुविधांबाबत माहिती अशा सुविधा ई-सेवा केंद्रांतून पुरविण्यात येणार आहे.