अमरावती : लग्न करण्याचे आमिष दाखवून एका तरूणीचे वारंवाार लैंगिक शोषण करण्यात आले. मात्र, आरोपीचे खरे रूप कळताच तिने त्यास नकार दिला. त्यामुळे त्याने तिचे अंतरंगाचे फोटो सोशल व्हायरल केले. तो एवढ्यावरच थांबला नाही, तर त्याने प्रकरणाची वाच्यता केल्यास तिचे ३५ तुकडे करण्याची धमकी चक्क फेसबुकहून दिली. याप्रकरणी पिडिताच्या तक्रारीवरून शहर कोतवाली पोलिसांनी १७ जून रोजी रात्री आरोपी मयूर रामधन गाडेराव (रा. अहमदाबाद, गुजरात) याच्याविरूद्ध बलात्कार व बदनामीचा गुन्हा दाखल केला.
तक्रारीनुसार, आरोपी मयूर व विवाहित २८ वर्षीय पिडिताची सन २०१८ पासून ओळख होती. पिडिताची पतीसोबत काैटुंबिक छळाची केस सुरू असताना त्यांच्यात प्रेमसंबंध देखील जुळले. त्याने नोव्हेंबर २०१९ मध्ये तिचेवर अमरावती येथील एका गेस्ट हाऊसमध्ये वारंवार बलात्कार केला. त्यानंतर देखील सन २०२० पर्यंत त्यांच्यात संवाद होता. मात्र, पुढे त्याने लग्न करण्यास नकार दिला.
दरम्यान १२ ऑगस्ट २०२२ रोजी मयुरने फेसबुकवर रियान शर्मा नावाने फेक अकाउंट तयार करून पिडिताला फ्रेंड रिक्वेस्ट पाठविली. त्यानंतर तो खोटे नाव सांगून तिच्याशी बोलत राहिला. मात्र तो आपला जुना प्रियकर मयुरच आहे, असे तिच्या लक्षात आले. त्यामुळे तू खोटे अकाउंट बनविले, असे तिने त्याला बजावले. त्यावर माझ्याकडून चुक झाली, मला माफ कर, पुन्हा असे होणार नाही. मी तुझ्या सोबत लग्न करतो, असे फेसबुक मॅसेज तिला पाठवले. परंतु त्याच्यावरील विश्वास उडाल्याने तिने लग्न करण्यास नकार दिला.
फेसबुक मॅसेजवर धमकी
तिने लग्नास नकार दिला असता, मयुरने तिला पुन्हा फेसबुकवरच ‘तुझे ३५ तुकडे करेन’, माझ्या घरच्यांना सांगशील तर तुझे फोटो सोशल व्हायरल करेन, अशी धमकी दिली. मात्र सर्वस्व हिरावलेल्या पिडिताने तिच्यावर झालेल्या बळजबरीची कहानी त्याच्या कुटुंबियांना सांगितली. त्यामुळे त्याने तिचे संपूर्ण फोटो तिच्या कुटुबांमध्ये व्हायरल केले. तथा तिची बदनामी केली.
अहमदाबादहून आला अमरावतीत
तक्रारकर्ती तरूणी मोर्शी येथील रहिवासी असून, तिचे मे २०१८ मध्ये लग्न झाले. मात्र, त्यांच्यात विसंवाद निर्माण झाला. त्यामुळे तिने पतीविरूध्द मोर्शी पोलिसांत काैटुंबिक छळाची तक्रार नोंदविली होती. ते प्रकरण न्यायप्रविष्ट असताना नातेवाईक असलेल्या मयुरशी तिची ओळख झाली. आपण लग्न करू, अशा आणाभाका त्याने दिल्या. तो ४ नोव्हेंबर २०१९ रोजी अमरावतीला आला. तिला देखील बोलावून घेतले. तीन दिवस तिच्यासोबत अमरावतीच्या गेस्ट हाऊसमध्ये राहून तो अहमदाबादला निघून गेला.