अमरावती : एकतर्फी प्रेमातून कोण काय करेल, कुणाला धमकी देईल, कुठे पोहोचेल, सांगता येत नाही. अशाच एका वनसाईड लव्ह’मधून एक मजनू चक्क तरुणीच्या नियोजित सासरी पोहोचला. लग्न करून तिला सून म्हणून तुम्ही घरात आणाल, तर मी जीवाचे बरेवाईट करेन, अशी धमकी चक्क तिच्या वागदत्त सासुबाईला दिली. त्याचे ते एकतर्फी प्रेम त्याला पोलीस ठाण्यात घेऊन गेले.
गाडगेनगर पोलीस ठाण्याच्या हददीत ८ फेब्रुवारी रोजी रात्री ११.३० वाजता हा प्रकार घडला. याप्रकरणी पोलिसांनी ९ फेब्रुवारी रोजी पहाटे एकच्या सुमारास विशाल यादव (रा. गोपालनगर) याच्याविरूद्ध विनयभंगाचा गुन्हा दाखल केला. तक्रारीनुसार, विशाल यादव व तरूणी परस्परांच्या परिचयातील आहे. तो संबंधित तरूणीचा घरापर्यंत पाठलाग करायचा. तिच्याशी बोलण्याचा प्रयत्न करायचा, दरम्यान, एक दिवस ती बाब तरूणीच्या लक्षात आली. सामाजिक बदनामी टाळण्यासाठी तिने त्याला पाठलाग का करतो, अशी विचारणा केली. त्यावर माझे तुझ्यावर प्रेम आहे, मला तुच हवी आहेस, मला तुझ्याशीच लग्न करायचे आहे, असा तो बडबडला. त्यावर तिने त्याला ठामपणे नकार दिला. ते समजून न घेता त्याने तिचा पाठलाग सुरूच ठेवला. त्याने त्याच्या एकतर्फी प्रेमाला देखील पुर्णविराम लावला नाही.
रात्रीला पोहोचला, धिंगाणा
दरम्यान, तरूणीचे लग्न जुळल्याची बाब त्याच्या कानावर गेली. त्यामुळे तो बुधवारी रात्री ११.३० च्या सुमारास तरूणीच्या नियोजित सासरी पोहोचला. तेथे धिंगाणा घालत तिचे लग्न झाले, तिला सून म्हणून तुम्ही घरी आणले, तर मी तेव्हाच आत्महत्या करेन, अशी धमकी दिली. ही बाब नियोजित सासुने तरूणीला फोन कॉल करून सांगितली. त्या घटनेने दोन्ही कुटुंब डिस्टर्ब झाले. अखेर तरूणीनेच मनाचा हिय्या करत बुधवारी रात्रीच पोलीस ठाणे गाठले.