अमरावती : फोटो व्हायरल करण्याची धमकी देऊन एका १८ वर्षीय युवतीचे लैंगिक शोषण करणाऱ्या २९ वर्षीय आरोपी प्रियकराला लोणी पोलिसांनी मंगळवारी गजाआड केले. त्यामुळे त्याचा ‘प्रपोझ डे’ कोठडीत गेला. १० फेब्रुवारीपर्यंत त्याची पोलीस कोठडी असल्याने त्याचा चॉकलेट व टेडी डे देखील पोलिसांच्या सान्निध्यात होणार आहे.
एका १८ वर्षीय तरूणीच्या तक्रारीवरून लोणी पोलिसांनी आरोपी भुषण नाना सोळंके (२९, जळू) याच्याविरूध्द ७ फेब्रुवारी रोजी सायंकाळी ७.३० च्या सुमारास बलात्कार, विनयभंग व धमकी दिल्याप्रकरणी गुन्हा दाखल केला. त्याला तातडीने अटक करण्यात आली. न्यायालयाने त्याला १० फेब्रुवारीपर्यंत पोलीस कोठडी सुनावली आहे. सुमारे पाच वर्षांपासून फिर्यादी व आरोपींची ओळख आहे. ओळखीचे रूपांतर प्रेमात झाले. १ जानेवारी २०१८ पासून त्यांच्यातील परिचय घट्ट होत गेला. तुझ्यावर आपले प्रेम आहे, अशी बतावणी करून तो तिच्याशी जबरदस्तीने बोलू लागला. तिच्याशी जवळीक साधत होता.
जून २०२१ मध्ये पिडिताची आई कामाला गेली असता ती घरी एकटीच होती. त्यावेळी आरोपी भुषण तिच्या घरात शिरला. माझ्या मोबाईलमध्ये तुझे अश्लिल फोटो काढलेले आहेत, तु माझ्यासोबत शारीरीक संबंध ठेव, अन्यथा मोबाईल मधील ते फोटो व्हायरल करेन, अशी धमकी त्याने दिली. त्या धमकीआड तिच्यावर वारंवार अतिप्रसंग केला.
आईला दिला धीर
त्या सर्व प्रकाराने पिडिता प्रचंड घाबरली. तुझा मोबाईल क्रमांक ब्लॉक करीत असल्याचे त्याला ठणकावून सांगितले. मात्र, त्यावर आरोपीने आपल्यासह आपल्या आईला देखील जीवे मारण्याची धमकी दिली, अशी तक्रार पिडिताने नोंदविली. पिडिताच्या आईने तिला धीर दिला. तथा ७ फेब्रुवारी रोजी लोणी पोलीस ठाणे गाठले. तेथे महिला पोलीस कर्मचाऱ्याने तिचे बयाण नोंदवून घेत गुन्हा दाखल केला.
१८ वर्षीय पिडिताच्या तक्रारीवरून मंगळवारी सायंकाळी गुन्हा दाखल केला. आरोपीला तत्काळ अटक केली. तथा त्याला न्यायालयात हजर केले. न्यायालयाने त्याला १० फेब्रुवारीपर्यंत पोलीस कोठडी सुनावली आहे.
- मिलिंदकुमार दवणे, ठाणेदार, लोणी