विजेच्या धक्क्याने पिल्लू दगावले : वाचविण्यासाठी माकडिणीची धडपड

मातृत्वाचे वरदान मनुष्य प्राण्यांप्रमाणेच पशुंनाही लाभले आहे. मनुष्याला शब्दांतून ममत्वाची प्रचिती देता येते. पशु मात्र प्रत्यक्ष कृतीतून ही भावना व्यक्त करतात.

नरेंद्र जावरे अचलपूर
मातृत्वाचे वरदान मनुष्य प्राण्यांप्रमाणेच पशुंनाही लाभले आहे. मनुष्याला शब्दांतून ममत्वाची प्रचिती देता येते. पशु मात्र प्रत्यक्ष कृतीतून ही भावना व्यक्त करतात. अशीच एक घटना रविवारी सकाळी ११.३० वाजताच्या दरम्यान घडली. जिवंत विद्युत तारेचा स्पर्श होऊन मृत्युमुखी पडलेल्या आपल्या चिमुकल्या पिल्लाला वाचविण्याकरिता एका माकडीणीने केलेली केविलवाणी धडपड आणि पिल्लाच्या मृत्यूनंतर झालेली तिची तगमग पाहून ते दृश्य पाहणाऱ्यांचे डोळेही नकळत पाणावले.
रविवार म्हणजे सुटीचा दिवस. सकाळी ११.३० वाजताची वेळ. परतवाडा शहराच्या मध्यभागी असलेल्या छोटा बाजार परिसरातील गवळीपुरा परिसरात माकडांचा एक कळप इकडून तिकडे हुंदडत होता. त्या कळपात एक लेकुरवाळी माकडीणही होती. क्षणात तिचे पिल्लू तिला बिलगे तर क्षणात या झाडाच्या फांदीवरून त्या झाडावर जाई. माकडीण मात्र आपल्या पिल्लासाठी जेवण शोधण्यात व्यस्त होती. एखाद्या घरात शिरून काही तरी शोधण्याच्या प्रयत्नात तिने उंच उडी घेतली.
अन् माकडिणीचा आकांत
अचलपूर : पिल्लानेही तिच्या पाठोपाठ असाच प्रयत्न केला. परंतु त्याचे उड्डाण कमी पडले अन् ते पिल्लू डीबीवरील जिवंत विद्युत तारेला जाऊन धडकले. विजेच्या धक्क्याने क्षणात त्याचा मृत्यू झाला.
विद्युत तारांना चिकटलेले पिल्लू पाहताच माकडीणीने आकांत सुरू केला. पोटच्या गोळ्याला वाचविण्याची तिची धडपड बघणाऱ्यांच्या हृदयाला हात घालणारी होती. पिल्लाला वाचविण्याकरिता माकडीणीने त्याला ओढण्याचा प्रयत्न केला. इतकेच नव्हे तर त्याला तोंडाद्वारे श्वासोच्छवास देण्याचा प्रयत्नही करीत होती. मात्र, तिचे प्रयत्न निष्फळ ठरले. पिल्लाला वाचविण्याच्या प्रयत्नात ही दुर्देवी माता गंभीर जखमी झाली. एका मूक मातेचा आकांत पाहून परिसरातील काही सहृदयी युवकांनी त्या पिल्लाला वाचविण्याचा प्रयत्न केला. मात्र, पिल्लाच्या मृत्यूने चवताळलेली माकडीण आक्रमक झाली होती. हा आकांत पाहून बघ्यांनाही गहिवरले.
क्रिकेट सामना ठरला अडसर
डीबीमधील जिवंत विद्युततारांचा स्पर्श झाल्याने माकडाच्या पिल्लाचा मृत्यू झाल्यानंतर माकडीणीला वाचविण्याच्या उद्देशाने परिसरातील बजरंग दलाच्या काही कार्यकर्त्यांनी विद्युत वितरण कंपनीसोबत संपर्क साधून वीज पुरवठा खंडित करण्याची मागणी केली. मात्र, विश्वचषकातील भारत-पाकिस्तानचा क्रिकेट सामना सुरू असल्याने वीज खंडित केली गेली नाही. शेवटी बजरंग दल कार्यकर्त्यांनी आक्रमक भूमिका घेतल्यानंतर वीज वितरण कंपनीचे कर्मचारी घटनास्थळी पोहोचले आणि त्यांनी लाकडी काठीने मृत पिल्लाला खाली पाडले. कर्मचाऱ्यांनी पुढील कारवाई केली.
आतापर्यंत या डीबीवर विजेच्या झटक्याने ५५ ते ६० माकडांचा मृत्यू झाला आहे. ही धोकादायक डीबी हटविण्याची मागणी परिसरातील नागरिकांनी केली. परंतु वीज वितरण कंपनीने अद्याप दखल घेतलेली नाही.
- राधाकिसन नंदवंशी,
नागरिक, छोटा बाजार, परतवाडा.
पिल्लाचा जीव वाचविण्यासाठी माकडीणीने केलेला प्रयत्न बघ्यांना गहिवरून सोडणारे होते. माकडांच्या जीवावर उठलेली ही डीबी हटविण्यात यावी.
- मोनू इर्शिद,
सामाजिक कार्यकर्ता, परतवाडा.