अमरावती विमानतळाचा मुद्दा उपमुख्यमंत्र्यांच्या पुढ्यात

बडनेरा : दहा वर्षांपासून रेंगाळत असलेल्या बेलोरा विमानतळाच्या कामकाजाला गती देण्यासाठी निधीचा मुद्दा कायम पुढे आला आहे. याबाबत उपमुख्यमंत्री अजित पवार यांना अवगत केले आहे. वित्तमंत्री असलेल्या उपमुख्यमंत्र्यांनी मागणीबाबत सकारात्मकता दर्शवली असून, विमानतळाच्या कामाला गती मिळेल, असा विश्वास पालकमंत्री यशोमती ठाकूर यांनी व्यक्त केला.

बेलोरा विमानतळ परिसरातील संरक्षण भिंत उभारण्याचे काम अर्धवट आहे. टर्मिनस बिल्डिंग तसेच रनवेचेदेखील काही काम अपूर्ण आहे. काही कामांसाठी निधीची आवश्यकता आहे. निधी उपलब्ध झाल्यास कामाला गती मिळून अमरावतीकरांना दळणवळणासाठी जलद साधन उपलब्ध होईल. याबाबत ‘लोकमत’ने २ फेब्रुवारी रोजी ‘विमानतळाहून उड्डाण केव्हा?’ या शीर्षकाने वृत्त प्रकाशित केले. त्याची दखल घेत पालकमंत्री ठाकूर यांनी मंगळवारी उपमुख्यमंत्री अजित पवार यांची मंत्रालयात भेट घेऊन त्यांना यासंदर्भात निवेदन दिले. याप्रसंगी राष्ट्रवादी काँग्रेसचे प्रदेश उपाध्यक्ष संजय खोडके उपस्थित होते.

अमरावती जिल्ह्याच्या विकासाच्या दृष्टीने विमानतळ लवकर पूर्ण होणे गरजेचे आहे. जिल्ह्यासाठी यापूर्वीच विमानतळ मंजूर असून, या कामासाठी पुरेसा निधी उपलब्ध नसल्याने विमानतळाचे काम संथ गतीने सुरू आहे. त्यामुळे या कामाला गती मिळण्यासाठी अंदाजपत्रक २०२१-२२ मध्ये पुरेसा निधी उपलब्ध करून द्यावा, अशी मागणी पालकमंत्री ठाकूर यांनी उपमुख्यमंत्री पवार यांना केली. त्याबाबत उपमुख्यमंत्र्यांनी सकारात्मकता दर्शवली असल्याचे पालकमंत्र्यांनी सांगितले.

दरम्यान, अमरावती जिल्ह्यातील वस्त्रोद्योग पार्क व त्यानुषंगाने औद्योगिक विकासाच्या मोठ्या शक्यता पाहता विमानतळ लवकरात लवकर पूर्ण होणे गरजेचे आहे. येथील उद्योगवाढीसाठीही पालकमंत्र्यांकडून वेळोवेळी पाठपुरावा होत असून, ‘मेक इन महाराष्ट्र’ अंतर्गत नवे उद्योगही उभारले जाणार आहेत. या पार्श्वभूमीवर विमानतळाची आवश्यकता आहे. तेथील कामे लवकरच गती घेतील, असा विश्वास पालकमंत्री ठाकूर यांनी व्यक्त केला.