उपविभागीय पोलीस अधिकारी श्रीनिवास घाडगेंकडून तपास काढा

नागपूर येथील रुग्णालयात जाऊन आश्रम ट्रस्टीचे कार्यकारी अध्यक्ष शिरीष चौधरी व त्यांची पत्नी चोरपावलांनी प्रथमेशच्या भेटीला जातात,...

शिरीष चौधरीच्या अटकेसाठी निदर्शने : लहुजी सेनेसह मानवी हक्क अभियानची मागणी
अमरावती : नागपूर येथील रुग्णालयात जाऊन आश्रम ट्रस्टीचे कार्यकारी अध्यक्ष शिरीष चौधरी व त्यांची पत्नी चोरपावलांनी प्रथमेशच्या भेटीला जातात, त्यांना तेथील पोलीस चौकशी न करता आज प्रवेश देतात. ही बाब पोलीस व विश्वस्तांमध्ये साटेलोटे असण्याचा संशय निर्माण करणारी आहे. त्या अनुषंगाने सखोल चौकशी करून शिरीष चौधरीला अटक करावी, त्याचप्रमाणे या प्रकरणाचा तपास करणारे उपविभागीय पोलीस अधिकारी श्रीनिवास घाडगे यांचे तपासकार्य असमाधानी असल्याने त्यांच्याकडून तपासकार्य काढावे, अशा मागण्या घेऊन लहुची सेनेसह मानवी हक्क अभियान संघटनेचे पदाधिकारी सोमवारी पोलीस अधीक्षक कार्यालयावर धडकले. यासंदर्भात निवेदन देण्यापूर्वी कार्यकर्त्यांनी कार्यालयासमोर तीव्र नारेबाजी केली.
नागपंचमीला प्रथमेश सगणेचा नरबळी घेण्याचा प्रयत्न झाला. त्याला नागपूर रुग्णालयात उपचारार्थ हलविण्यात आले. मात्र, तेथेही त्याच्या जीवाला धोका निर्माण होणारे प्रकार समोर येत आहे. शंकर महाराज यांच्या आश्रम संस्थाचे अध्यक्ष शिरीष चौधरी, त्यांची पत्नी व अन्य सहकारी हे प्रथमेशला भेटण्याकरिता चोरून आयसीयूत गेले. प्रथमेशचे फोटो काढले, त्यांचे चोरून आत जाण्याचे कारण काय, त्याचा आत जाण्याचा उद्देश काय होता, असा सवाल लहूजी सेनेने उपस्थित केला आहे. प्रथमेशला भेटण्यासाठी पत्रकारांना व अन्य कोणालाही पोलिसांकडून मज्जाव केला जातो. मग तिथे ट्रस्टीना कसे काय जाऊ दिल्या जाते, या प्रकारामुळे प्रथमेशचा जीव धोक्यात येण्याची शक्यता आहे. प्रथमेशच्या सुरक्षेसाठी तैनात असणारे पोलीस अधिकारी व कर्मचारी याबाबत बघ्यांची भूमिका का घेतात. याप्रकारामुळे पोलीस व विश्वस्तांमध्ये साटेलोटे असल्याची दाट शक्यता असल्याचा आरोप लहुजी सेनेने निवेदनातून केला आहे. प्रथमेशच्या सुरक्षेमध्ये अधिक लक्ष देण्याची गरज आहे. तसेच तेथे तैनात पोलीस अधिकाऱ्यांची चौकशी करून त्यांच्यावर योग्य ती कारवाई करावी, त्याचप्रमाणे शिरीष चौधरी याला अटक करून सखोल चौकशी करून प्रथमेशला न्याय द्यावा, अशी मागणी लहुजी सेनेने केली आहे.
प्रथमेश प्रकरणात तपास अधिकारी तपासकार्याबद्दल काही बोलायला तयार नाहीत, त्यांचे तपास कार्य असमाधानी असल्याची ओरड प्रथमेशच्या हितचिंतकांची आहे. त्यामुळे घाडगेंकडून तपासकार्य काढण्यात यावा, अशीही मागणी आता जोर धरू लागली आहे. निवेदनदेतेवेळी विदर्भ अध्यक्ष रुपेश खडसे, गणेशदास गायकवाड, उत्तमराव भैसने, गणेश कलाने, अभोंरे, युवराज गजभिये, संतोष दांडगे, कैलास स्वर्गे, निरंजन सगणे, बबलू तायडे, पकंज जाधव यांच्यासह मानवी हक्क अभियान संघटनेचे महानगर अध्यक्ष प्रभाकर वाळसे व शेकडो कार्यकर्ता उपस्थित होते.