आदर्श शिक्षक पुरस्कार अद्यापही लॉकडाऊनच

अमरावती : दरवर्षी जिल्हा परिषदेच्या प्राथमिक शिक्षण विभागाकडून आदर्श शिक्षक पुरस्कार दिले जातात. परंतु सन २०१९-२० चे आदर्श शिक्षक पुरस्कार जाहीर झाल्यानंतरही अजूनपर्यंत लॉकडाऊनच आहेत. सदर पुरस्कार वितरणाचा मुहूर्त काढण्यात न आल्याने शिक्षकांमध्ये नाराजी व्यक्त होत आहे.

जिल्हा परिषदे अंतर्गत कार्यरत शिक्षकांना शैक्षणिक कार्यात उल्लेखनीय कामगिरी केलेल्या शिक्षकांना दरवर्षी ५ सप्टेंबर या शिक्षकदिनी आदर्श शिक्षक पुरस्काराने सन्मानित केले जातात. मात्र, काही वर्षांपासून विविध कारणांमुळे आदर्श शिक्षक पुरस्काराचे वितरण वेळेत होत नसल्याचे वास्तव आहे. अशातच सन २०१९-२० या वर्षांतील आदर्श शिक्षक पुरस्कारपाप्त शिक्षकांची यादी विभागीय आयुक्तांनी ११ जानेवारी रोजी प्राथमिक शिक्षण विभागाने सादर केलेल्या आदर्श शिक्षक पुरस्काराच्या प्रस्तावास मंजुरी दिली. त्यानंतर प्राथमिक शिक्षण विभागाने आदर्श शिक्षक पुरस्कारप्राप्त शिक्षकांची यादीही जाहीर केली आहे. यात १४ प्राथमिक आणि १ माध्यमिक अशा १५ शिक्षकांना आदर्श शिक्षक पुरस्कार घोषित झालेला आहे. परंतु जिल्ह्यात कोरोनाचा वाढता संसर्ग लक्षात घेता पुरस्कार वितरणाचा कार्यक्रम झेडपीकडून घेण्यात आला नाही. त्यामुळे प्राथमिक शिक्षक समितीने आदर्श शिक्षक पुरस्कार हे २६ जानेवारी रोजी वितरित करण्याची मागणी केली होती. ही मागणी मान्य होऊन पुरस्कार जाहीर झाले तेव्हापासून वितरणाचा मुहूर्त निघाला नाही. त्यामुळे आदर्श शिक्षक पुरस्कार अद्यापही लॉकडाऊनच आहेत.

बॉक्स

१० मार्चला वितरणाची मागणी

जिल्हा परिषदेचे आदर्श शिक्षक पुरस्कार अद्याप वितरित केलेले नाहीत. अशातच सध्या कारोनाचा वाढता संसर्ग लक्षात घेता कोरोना प्रतिबंधात्मक उपाययोजनाबाबतच्या त्रिसूत्रीचे काटेकोर पालन करून येत्या १० मार्च रोजी सावित्रीबाई फुले यांच्या स्मृतीदिनाचे औचित्य साधून पुरस्काराचे वितरण करावे, अशी मागणी प्राथमिक शिक्षक समितीने केली आहे.