पालकमंत्री, ‘त्या ’रस्त्याचे हस्तांतरण रोखाच !

दारूविक्रीतून येणारा महसूल वाचविण्यासाठी पंचवटी ते पुढे वलगाव या राज्य महामार्गाचे महापालिकेकडे हस्तांतरण करण्याचा घाट राज्य शासनाने घातल्याची माहिती समोर आली आहे.

नागरिकांचा आग्रह : दारुविक्रीसाठी रस्त्यांची मालकी बदलण्याचा घाट
अमरावती : दारूविक्रीतून येणारा महसूल वाचविण्यासाठी पंचवटी ते पुढे वलगाव या राज्य महामार्गाचे महापालिकेकडे हस्तांतरण करण्याचा घाट राज्य शासनाने घातल्याची माहिती समोर आली आहे. एक संपूर्ण पिढी बरबाद करायची असेल तर या मार्गाचे हस्तांतरण पालकमंत्र्यांनी खुशाल करावे, अन्यथा हे हस्तांतरण रोखावे, अशी आग्रही अपेक्षा या भागातील लाखो नागरिक व्यक्त करीत आहेत.
जिल्ह्यातील ३९८ दारुदुकांनाना सर्वोच्च न्यायालयाच्या या आदेशाचा फटका बसला आहे. सुमारे ७ कोटींचा शासनाचा महसूलही बुडाला आहे. त्या पार्श्वभूमिवर महापालिका क्षेत्रातील सार्वजनिक बांधकाम विभागाचे काही रस्ते अवर्गीकृत करण्याचा निर्णय राज्यशासनाने घेतला आहे. त्यात पंचवटी ते पुढे वलगाव मार्गाचा समावेश असल्याची माहिती आहे. या मार्गाचे महापालिकेकडे हस्तांतरण झाल्यास दारूविक्री पुन्हा बेफामपणे पूर्ववत होईल आणि पर्यायाने मद्यपींचा राजरोस धिंगाणा मुकाट्याने सहन करण्याशिवाय पर्याय उरणार नाही, अशी भीती या मार्गावर राहणाऱ्या लाखो अमरावतीकरांना भेडसावत आहे. एकीकडे सर्वोच्च न्यायालयाच्या आदेशानुसार या भागातील ७५ च्या संख्येत असलेल्या दारुदुकानांना टाळे लागल्यामुळे मद्यपींच्या त्रासाला कंटाळलेल्या लाखो नागरिकांचा जीव भांड्यात पडला. मात्र, हे सुख अल्पजीवी ठरले. या मार्गावर असलेल्या फॉर्मसी कॉलेजची संरक्षण भिंत दारुड्यांसाठी हॉट फेव्हरेट ठरत आहे. दिवसाढवळया या रस्त्यावर अनेक ठिकाणी राजरोसपणे दारू ढोसली जाते. त्याचा त्रास महाविद्यालयीन विद्यार्थिनींना अधिक होतो. या परिसरात सर्वाधिक शैक्षणिक संस्था आहेत. या भागातील दारू दुकानांमुळे तेथील कायदा व सुव्यवस्था पार बिघडली आहे.

सोईस्कर पळवाट
राष्ट्रीय आणि राज्य महामार्गापासून ५०० मीटरपर्यंत मद्यविक्री करण्यावर सर्वोच्च न्यायालयाने घातलेली बंदी शनिवारपासून लागू झाल्याने मद्यसम्राटासह ‘सरकारचे धाबे दणाणले आहे. या निर्णयाने राज्य सरकारला तब्बल ७ हजार कोटी रुपयांच्या महसुलावर पाणी फेरावे लागले. त्यामुळे सरकारने रस्त्यांची मालकी बदलविण्याची पळवाट शोधली आहे. शहरातून जाणाऱ्या सार्वजनिक बांधकाम विभागाच्या अखत्यारीतील काही रस्ते त्यासाठी महापालिकेकडे हस्तांतरित करण्यात येणार आहेत.

सर्वदूर मद्याची बाधा
पंचवटीकडून वलगावकडे जाणाऱ्या मार्गावर अनेक शाळा -महाविद्यालये आहेत. या परिसरात सर्वाधिक विद्यार्थी -विद्यार्थीनी भाड्याने राहतात. या मार्गावरील अनेक वसाहती उच्चभ्रू म्हणून ओळखल्या जातात .तथापि या मार्गाला आता दारुड्यांचा मार्ग संबोधल्या जातो. तंत्रनिकेतन, शासकीय अभियांत्रिकी, मातोश्री विमलाबाई देशमुख, लाहोटी, डॉ.पंजाबराव देशमुख तंत्रनिकेतन महाविद्यालयासह संत गाडगेबाबा मंदिरासमोरील खुले मैदान, पोलिस स्टेशनच्या मागील बाजूने सर्रास मद्यपींचा वावर असतो. नागरी वस्त्यांमधील सर्व्हीस लाईनचा आधार घेऊन धिंगाणा घातला जात आहे. पालकमंत्री प्रवीण पोटे यांच्या घराकडे जाणाऱ्या रस्त्यावर असलेल्या मद्यविक्र ीच्या दुकानासमोर उघडपणे मद्य रिचविले जाते.