परप्रांतीय ट्रॅक्टरचालकांना द्या ओळखपत्र

चोरी, दरोड्याची शक्यता, आम आदमी पार्टीचे एसडीओंना निवेदन

चांदूर रेल्वे : परप्रांतीय ट्रॅक्टरचालकांकडून लूट, दरोड्याची शक्यता असून, त्यांची ओळख पटविण्याकरिता ओळखपत्र मिळविल्यानंतरच त्यांना काम करण्याची परवानगी द्यावी, अशी मागणी आम आदमी पार्टीने उपविभागीय अधिकाऱ्यांना गुरुवारी निवेदनातून केली.

सध्या शेतात तूर व रबीतील पिकांची काढणी होत आहे. त्यासाठी परप्रांतीय ट्रॅक्टरसह चालकांनी शिरकाव केला. ते शेतकऱ्यांना कमी किमतीत पीक काढून देण्याचे आमिष देतात. त्याच्या बळावर रस्त्यांवर रात्री-अपरात्री ट्रॅक्टर उभे करून गावात फिरण्याची मुभा मिळते. त्यांच्याआड चोरी, दरोड्यासारखी प्रकरणे होऊ शकतात. याआधी याच भागात परप्रांतीयांकडून नकली नोटांचा वापर केला गेला. त्यामुळे परप्रांतीयांना ओळखपत्र देऊनच शिवारात कामे करण्यास परवानगी द्यावी. त्यांच्याकडे ओळखपत्र, ट्रॅक्टरची कागदपत्रे नसल्यास नियमाप्रमाणे कारवाई व्हावी, अशी मागणी आम आदमी पार्टीने केली. निवेदन देतेवेळी आम आदमी पार्टीचे पश्चिम विदर्भ संघटन मंत्री नितीन गवळी, मनोहर वगारे, विनोद लहाने, चरण जोल्हे, पंकज गुडधे, कमलकिशोर पनपालिया, गजानन वगारे, साजन भगत, गोपाल मुरायते, नारायण कडू, अमोल आमले, राजुराम बाबर, सुभाष मानकर, वैभव शेळके, घनश्याम मरगडे, पुरुषोत्तम पुंड, आकाश ईटेकर, रोशन नेवारे, कैलास गावंडे, रवी सहारे, मंगेश आगाशे, भारती महाराज, मुकेश कडू आदी उपस्थित होते.