राजकोटवाला स्वीट सेंटरवर एफडीएची धाड

‘राजकोटवाला’ स्वीट सेंटरमध्ये अस्वच्छ जागेत व घाणीच्या ठिकाणी मिठाई व खाद्यपदार्थ तयार करीत असल्याचे प्रकरण...

दोन नमुने तपासणीला पाठविणार : अस्वच्छ जागेत मिठाई निर्मिती
अमरावती : ‘राजकोटवाला’ स्वीट सेंटरमध्ये अस्वच्छ जागेत व घाणीच्या ठिकाणी मिठाई व खाद्यपदार्थ तयार करीत असल्याचे प्रकरण 'लोकमत'ने पुराव्यानिशी उघडकीस आणले होते. हे वृत्त प्रकाशित होताच एफडीएच्या अधिकाऱ्यांनी ‘राजकोटवाला’ स्वीट सेंटरवर धाड टाकून दुकानाची झाडाझडती घेतली. पाहणीअंती बुंदी व काजूकतलीचे दोन नमुने घेण्यात आले असून हे नमुने तपासणीसाठी जिल्हा आरोग्य प्रयोगशाळेत पाठविण्यात येणार आहेत.
जयस्तंभ चौकातील राठी कॉम्पलेक्समध्ये असलेल्या ‘राजकोटवाला’ मिठाई सेंटरमध्ये सोमवारी दुपारी २ वाजता अन्न सुरक्षा अधिकारी विश्वजित शिंदे व नीलेश ताथोड यांनी धाड टाकून ही कारवाई केली.
रविवारी लोकमत प्रतिनिधीने राजकोेटवाला प्रतिष्ठानाच्या खाद्यपदार्थ तयार करण्यात येणाऱ्या जागेची पाहणी करून सचित्र वृत्त प्रकाशित केले होते. यावेळी अत्यंत घाण जागेवर रसगुल्ला, बुंदी, मिठाई व पेढा तयार करण्यात येत होता. ज्याठिकाणी बुंदीचा ट्रे ठेवला होता तेथून काहीच अंतरावर प्लास्टिकचा कचरा जाळला जात होता. तो कचरा व त्याची राख उघड्यावरील बुंदीच्या ट्रेमध्ये उडत होती. इतकेच नव्हे तर उघड्यावरच ठेवण्यात आलेल्या रसगुल्ल्याच्या भांड्याभोवताल माशा भणाणत होत्या. हा किळसवाणा प्रकार लोकमतने कॅमेराबद्घ केला होता.

संचालकांना बजावणार नोटीस
अमरावती : त्यामुळे अन्न व सुरक्षा मानदे कायद्याची पायमल्ली केली जात असल्याचे स्पष्ट झाले. हे वृत्त प्रकाशित होताच एफडीएने कारवाईचा बडगा उगारला आहे.
हॉटेल चालकाने अन्न सुरक्षा मानदे कायद्याचे उल्लंघन केल्याचे निदर्शनास आल्याने एफडीएद्वारे राजकोटवाला मिठाई सेंटरच्या संचालकाला सुधारणा नोटीस बजावणार असल्याचे एफडीएचे अन्न सुरक्षा अधिकारी विश्वजीत शिंदे यांनी सांगितले. नमुने दोषी आढळल्यास संचालकांवर कारवाईचा बडगा उगारण्यात येणार आहे. एफडीएच्या अधिकाऱ्यांनी तासभर ही तपासणी केली. (प्रतिनिधी)

राजकोटवाला मिठाई सेंटरची तपासणी करण्यात आली आहे. दोन नमुने जिल्हा आरोग्य प्रयोगशाळेत तपासणीसाठी पाठविण्यात येणार असून लवकरच संचालकाला नोटीस बजावण्यात येईल. नमुने दोषी आढळल्यास कारवाई करण्यात येईल.
-विश्वजीत शिंदे,
अन्न सुरक्षा अधिकारी.