अमरावती : एका खासगी बॅंकेच्या रिकव्हरी ऑफिसर महिलेकडील २१ हजार रुपये रोख रक्कम हिसकावून पळ काढणाऱ्या भामट्याला राजापेठ पोलिसांनी ७ जून रोजी अटक केली. अक्षय किशोर मेश्राम (वय ३० वर्षे, रा. महादेवखोरी, अमरावती) असे अटक आरोपीचे नाव आहे. विशेष म्हणजे, आरोपी अक्षयने हिसकावलेल्या २१ हजारांपैकी १८ हजार रुपये स्वत:च्या बॅंक खात्यात जमा केले होते. ते १८ हजार रुपये पोलिसांकडून फ्रिझ करण्यात आले. त्याच्याकडून गुन्हयात वापरलेली ८० हजारांची मोपेडदेखील जप्त करण्यात आली.
रिकव्हरी ऑफिसर असलेल्या वैशाली चिंचोलकर या ३ जून रोजी रात्री आठच्या सुमारास बॅंकेचे २१ हजार रुपये घेऊन बॅगमध्ये घेऊन जाण्याकरीता गाडीवर बसल्या. त्याचवेळी आरोपीने त्यांच्याकडील बॅग हिसकावून त्यातील रक्कम काढून तथा बॅग तेथेच फेकून पळ काढला होता. याप्रकरणी, राजापेठ पोलिसांनी गुन्हा दाखल करून तपास आरंभला होता. दरम्यान सीसीटिव्हि फुटेज व अन्य माहितीवरून अक्षय मेश्रामला ताब्यात घेण्यात आले. त्याने गुन्ह्याची कबुली दिली. पोलीस आयुक्त अरविंन चावरिया यांच्या मार्गदर्शनाखाली ठाणेदार पुनीत कुलट, पीएसआय मिलिंद हिवरे, हवालदार मनीष करपे, अंमलदार पंकज खटे, रवी लिखीतकर, गणराज राउत, विजय राउत, सागर भजगवरे, अर्जुन कदम यांनी ही कारवाई केली.