डफरीनमध्ये दिवसाकाठी एका बाळाचा मृत्यू !

अमरावती जिल्हा स्त्री रुग्णालयात (डफरीन) दर महिन्यात ७०० ते ८०० महिलांची प्रसूती केली जाते. त्यात दर दिवसाला सरासरी एका बाळांचा मृत्यू होत असल्याची धक्कादायक माहिती पुढे आली आहे

 १८३३ प्रसूती : एप्रिल महिन्यात ४४ बाळांचा मृत्यू

वैभव बाबरेकर - अमरावती जिल्हा स्त्री रुग्णालयात (डफरीन) दर महिन्यात ७०० ते ८०० महिलांची प्रसूती केली जाते. त्यात दर दिवसाला सरासरी एका बाळांचा मृत्यू होत असल्याची धक्कादायक माहिती पुढे आली आहे. पोटातील गोळ्याचा नऊ महिने सांभाळ केल्यानंतर प्रसूती दरम्यान त्या मातेसमोर तिच्या बाळाचा मृत्यू होत असेल तर ही बाब अत्यंत वेदना देणारी ठरते. जिल्हा स्त्री रुग्णालयात दर दिवसाला सरासरी एका मातेवर हा दु:खद प्रसंग ओढवत आहे. जिल्ह्यातील विविध ठिकाणाहून गोरगरीब महिला प्रसूतीचा उपचाराकरिता जिल्हा स्त्री रुग्णालयात मोठ्या आशेने येतात. त्यापैकी काही महिलांच्या हाती निराशा येत असल्याचे निर्देशनास येत आहे. जिल्हा स्त्री रुग्णालयात दररोज शेकडो महिलांना प्रसूतीकरिता दाखल केल्यावर त्यापैकी १० ते १५ महिलांची दररोज प्रसूती केली जात आहे. १ जानेवारी २०१४ ते एप्रिल महिन्यापर्यंत रुग्णालयात ३ हजार २१२ महिलांची प्रसूती करण्यात आले आहे. यामध्ये १६६५ मुले व १४९३ मुली जन्माला आल्या आहेत. मात्र यामध्ये ३ हजार २१२ प्रसूत महिलांपैकी १२४ महिलांचे बाळ दगावले आहेत. या रुग्णालयात रुग्णांना योग्य उपचाराची सुविधा नसल्याची ओरड नेहमीच होत असते. रुग्णालयीन परिसरात अस्वच्छता तसेच रुग्णालयात डॉक्टर, परिचारिका व कर्मचार्‍यांची अपुरी संख्या यामुळे रुग्णांना योग्य वेळी योग्य उपचार मिळत नसल्याचे दिसून येते. अश्या प्रकारामुळेच बाळ दगावण्याच्या घटनाही वाढत असल्याचे निर्देशनास येत आहे.