महावितरण कर्मचाऱ्यांना मारहाण झाल्यास फौजदारी कारवाई

अमरावती : गंभीर आर्थिक संकटामुळे महावितरणकडून थकीत बिलांच्या वसुलीसाठी ग्राहकांचा वीजपुरवठा खंडित करण्याच्या कारवाईदरम्यान अभियंते, कर्मचारी यांना शिवीगाळ, धक्काबुक्कीचे प्रकार होत आहेत. अशाप्रकारे मारहाण तसेच कार्यालयांची तोडफोड करून नासधूस झाल्यास तात्काळ फौजदारी कारवाई करण्याच्या सूचना जिल्ह्यातील सर्व क्षेत्रीय कार्यालयांना महावितरणच्या वरिष्ठ अधिकाऱ्यांनी दिल्या आहेत.

सरकारी कामात अडथळा (कलम ३५३), कर्मचाऱ्यांशी वाद, अपशब्द (कलम ५०४), धमकी (कलम ५०६), मारहाण (कलम ३३२व ३३३), कार्यालयात जबरीने प्रवेश करून तोडफोड (कलम ४२७), सरकारी मालमत्तेचे नुकसान, कार्यालयात गोंधळ (कलम १४३, १४८ व १५९), अनधिकृत जमाव (कलम १४१ व १४३) आदी प्रकारांविरुद्ध भारतीय दंड विधानाच्या कलमांन्वये कारवाईची तरतूद आहे. या विविध कलमांन्वये २ ते १० वर्षे कारावासाची तरतूद आहे.

जिल्ह्यात १ फेब्रुवारीपासून वीज बिल वसुली मोहीम सुरू करण्यात आली आहे. या मोहिमेदरम्यान अमरावती शहर विभागात ४, अमरावती ग्रामीण विभागात ७, अचलपूर मध्ये १, तर मोर्शी विभागात ३ ठिकाणी महावितरण कर्मचाऱ्यांना वीज ग्राहकांकडून मारहाण झाली आहे. अधीक्षक अभियंता दिलीप खानंदे व सर्व विभागीय कार्यकारी अभियंत्यांकडून कर्मचाऱ्यांच्या भेटी घेऊन त्यांचे मनोबल वाढविण्यासाठी प्रयत्न करण्यात येत आहे.