कोरोनाचा आलेख वाढताच

अमरावती: कोरोना संक्रमित रुग्णसंख्येचा आलेख वाढताच आहे. गुरुवारी एकूण १५८ पॉझिटिव्ह रुग्ण आढळून आले असून, उपचारादरम्यान एकाचा मृत्यू झाल्याची माहिती आरोग्य यंत्रणेने दिली. मार्चपासून आतापर्यंत २२ हजार ४३४ संक्रमित रुग्ण आढळून आले तर, ४२३ जणांचा कोरोनाने बळी घेतला.

आरोग्य यंत्रणेच्या सूत्रानुसार, आसरा मोझरी येथील कोरोनाबाधित एका ६४ वर्षीय पुरुषाचा खासगी रुग्णालयात उपचारादरम्यान मृत्यू झाला आहे. एकंदरीत २१३ संक्रमित रुग्ण रुग्णालयात उपचार घेत आहेत. तर १५३ रुग्ण बरे होऊन घरी परतले आहेत. महापालिका हद्दीत ३३ तर, ग्रामीण भागात १०६ रुग्ण गृहविलगीकरणात आहेत. ॲक्टीव्ह रुग्णांची संख्या ३५२ असल्याची नाेंद करण्यात आली आहे. आतापर्यंत १ लाख ८१ हजार ९०० नमुने तपासले आहेत.

--------------------

धोक्याची घंटा वाजतेय

नवीन वर्षात जानेवारीपासून सातत्याने कोरोना संक्रमित रुग्ण वाढत असल्याने ही बाब जिल्ह्यासाठी धोक्याची घंटा मानली जात आहे. तसेच कोरोनाने दरदिवशी रुग्णांचा मृत्यू होत असल्याची आकडेवारी पुढे येत आहे. अचानक कोरोनाचा आलेख वाढत असताना नागरिक मात्र बेफिकिरपणे वावरत आहेत. मास्कचा वापर कमी झाला आहे. शारीरिक अंतराची नियमावली गुंडाळली आहे. बाजारपेठेत गर्दी वाढली असून कोरोना हद्दपार झाल्याच्या आविर्भावात नागरिक वावरत आहेत.