जिल्हा परिषदेत कोरोना ब्लास्ट

अमरावती : जिल्हा परिषदेतील १४ अधिकारी व कर्मचाऱ्यांचे कोरोना चाचणी अहवाल पॉझिटिव्ह आला आहे. नव्या वर्षात जिल्हा परिषदेत कोरोना संक्रमणाचा हा सर्वांत मोठा आकडा आहे.

जिल्हा परिषदेतील अधिकारी व कर्मचारी मिळून सहा जण ५ फेब्रुवारी रोजी घेण्यात आलेल्या कोरोना चाचणीत संक्रमित आढळून आले होते. त्यानंतर दोन ते तीन दिवसांपूर्वी जिल्हा परिषदेतील १०८ अधिकारी व कर्मचाऱ्यांचे स्वॅब घेण्यात आले. त्यासंबंधी १ मार्च रोजीच्या अहवालात एका उपमुख्य कार्यपालन अधिकाऱ्यासह पंचायत, सामान्य प्रशासन, आराेग्य, सिंचन, जिल्हा ग्रामीण विकास यंत्रणा, रोजगार हमी योजना विभाग तसेच जिल्हा परिषद अध्यक्षांच्या दालनातील एक असे १३ पेक्षा अधिक अधिकारी व कर्मचाऱ्यांचे कोरोना चाचणी अहवाल पॉझिटिव्ह आले आहेत. त्यामुळे मिनीमंत्रालयात एकाच दिवशी मोठया प्रमाणात कोरोना संक्रमित आढळून आल्याने अधिकारी व कर्मचाऱ्यांमध्ये कोरोनाचा वाढता संसर्ग लक्षात घेता चिंता वाढली आहे.

बॉक्स

प्रशासनाकडून विभागाचे निर्जंतुकीकरण

जिल्हा परिषदेतील विविध विभागांतील काही अधिकारी व कर्मचाऱ्यांचे कोरोना चाचणी अहवाल पॉझिटिव्ह आले आहेत. त्यामुळे या सर्व कार्यालयाचे फवारणी यंत्रणाद्वारे निर्जंतुकीकरण करण्यात आले. कोरोनाचा वाढता संसर्ग लक्षात घेता, प्रत्येक अधिकारी व कर्मचाऱ्याने कोरोना प्रतिबंधात्मक उपाययोजनांसाठी दिलेल्या त्रिसूत्रीचे काटेकाेर पालन करण्याचे आवाहन प्रशासनाने केले आहे.