चिखलदरा नगर परिषदेचा अर्थसंकल्प सादर

कोरोनामुळे उत्पन्नात घट : विविध विकासकामांना प्राधान्य

चिखलदरा : स्थानिक नगर परिषदेचा शिलकीचा अर्थसंकल्प नगराध्यक्ष विजया राजेंद्रसिंह सोमवंशी यांनी मंगळवारी सादर केला. लॉकडाऊनमुळे पालिकेच्या उत्पन्नात घट झाली आहे. तथापि, विविध विकासकामांना या अर्थसंकल्पात प्राधान्य देण्यात आले आहे.

महाराष्ट्र नगर परिषदा, नगर पंचायती व औद्योगिक नगरी अधिनियमानुसार नगराध्यक्ष सोमवंशी यांनी सन २०२१-२२ करिता उत्पन्न व खर्चाचा वार्षिक अर्थसंकल्प सादर केला. नगर परिषदेने ९ कोटी ५६ लक्ष १८ हजार एवढ्या रकमेच्या अर्थसंकल्पास मंजुरी प्रदान केली. अध्यक्षांच्यावतीने लेखापाल प्रमोद वानखडे यांनी अंदाजपत्रक सभेसमोर वाचून दाखविले. विविध तरतुदींचे स्पष्टीकरण मुख्याधिकारी सुधाकर पानझाडे यांनी सभेमध्ये केले. यावेळी उपाध्यक्ष शेख अब्दुल शेख हैदर, सभापती अरुण तायडे, राजेश मांगलेकरसह नगरसेवक कर्मचारी अनिकेत लहाने, नौरंगाबादी उपस्थित होते.

---------

अर्थसंकल्पाची ठळक वैशिष्ट्ये

नवीन आर्थिक वर्षातील अंदाजपत्रकात मालमत्ता पुनर्मूल्यांकन, घनकचरा व्यवस्थापन, पर्यटनवाढीसाठी उपाययोजना तसेच दुर्बल घटक, दिव्यांग कल्याण, महिला व बालके विकास यांसाठी विशेष तरतूद ठेवण्यात आली आहे.

* शासनाकडून मिळणाऱ्या अनुदानामधून पर्यटनवाढीच्या अनुषंगाने शहरातील उद्याने, सेल्फी पॉईंट विकसित करणे, दर्शनीय स्थळांचे रस्ते, शहरातील अंतर्गत रस्ते आणि नाल्या बांधकाम व विकासात्मक कामांचे नियोजन करण्यात आले. पंधराव्या वित्त आयोगांतर्गत पर्यावरणपूरक उपक्रम, रेन वॉटर हार्वेस्टिंग व सोलर पॅनल बसविण्याबाबत तरतूद करण्यात आली. विशेष वैशिष्ट्यपूर्ण योजनेंतर्गत शहरातील दिवाबत्तीची सोय करण्यात आली आहे. स्वच्छ महाराष्ट्र अभियान पुरस्कार निधी अंतर्गत माझी वसुंधरा अभियान अंतर्गत जनजागृतीबाबत विविध कार्यक्रमांचे नियोजन करण्यात आले आहे.

कोरोना प्रादुर्भावापासून बचावासाठी विशेष तरतूद करण्यात आली आहे. चौक सौंदर्यीकरण व प्रवासी कर नाका सुधारणेसाठी तरतूद करण्यात आली आहे.

----------