दहा महिन्यांनंतर शाळेच्या फळ्यावर खडू

तिवसा येथील जिल्हा परिषद शाळेत पहिल्याच दिवशी ८० टक्के उपस्थिती, शिक्षकांकडून विशेष काळजी

तिवसा : पाचवी ते आठवीतील विद्यार्थ्यांसाठी कोरोनाकाळात पहिल्यांदा बुधवारी शाळा उघडल्या तेव्हा त्याला विद्यार्थ्यांनी उत्स्फूर्त प्रतिसाद दिला. तिवसा येथील जिल्हा परिषद शाळेत मुलांनी ८० टक्के उपस्थिती दर्शविली. यावेळी शिक्षकांनी सॅनिटाईजर, मास्क, फिजिकल डिस्टन्सिंगसह इतर बाबी पाळून मुलांचे शाळेत जंगी स्वागत केले.

तिवसा जिल्हा परिषद शाळेतील शिक्षकांनी विद्यार्थ्यांचे व पालकांचेसुद्धा गुलाबपुष्प देऊन स्वागत केले. शाळा सुरू होण्यापूर्वी काळजी म्हणून सर्व वर्गखोल्या, शाळा परिसरात जंतुनाशक फवारणी केल्या आहेत. प्रत्येक शिक्षकांची कोरोना टेस्ट करण्यात आली असून, विद्यार्थ्यांना शाळेत पाठवण्यापूर्वी पालकांचे संमतिपत्र घेण्यात आले. पहिल्या दिवशी मोठ्या संख्येने विद्यार्थी शाळेत उपस्थित होते. तिवसा पंचायत समिती सभापती शिल्पा रवींद्र हांडे यांनी सावित्रीबाई फुले यांच्या प्रतिमेचे पूजन करून शिक्षकांच्या या उपक्रमाचे कौतुक केले. याप्रसंगी शाळा केंद्रप्रमुख दलवीर व्यास, मुख्याध्यापिका हर्षा बांबल, पुष्पा पाटणे, छाया देशमुख, चंद्रकांत मानहोर, कृष्णा चिचमलकर, श्रीकृष्ण कोंडाणे, मंदा घुगुसकर, संध्या पाटील यांच्यासह शिक्षक, शिक्षिका उपस्थित होत्या.

---------------------------------------

पहिल्या दिवशी मुलांची ८० टक्के उपस्थित..

तिवसा पंचायत समिती अंतर्गत येणाऱ्या ७४ शाळा सुरू झाल्या. या सर्व शाळांमध्ये लहान मुलांची विशेष काळजी घेत, विविध व्यवस्था त्याप्रमाणे करण्यात आली. तर तिवसा पूर्व माध्यमिक मुलांच्या शाळेत विविध फुलांनी सजावट रांगोळी काढण्यात आली. मुलांना व पालकांना पुष्पगुच्छ देऊन स्वागत करण्यात आले. याबाबत पालकांनी समाधान व्यक्त केले.

----------------------------------