नांदगावच्या टोलविरोधात आंदोलनांची साखळी

निर्णायक आंदोलन : मोर्शीत बैठक

मोर्शी : अमरावती शहरालगत नांदगाव पेठ येथील टोलविरोधात निर्णायक व आक्रमक आंदोलन करण्यासंबंधी मोर्शीतील दुर्गानगर येथे दुर्गादेवी मंदिरात टोलमुक्ती समितीच्यावतीने बैठकीचे आयोजन करण्यात आले होते. त्यात आंदोलनाचे विविध टप्पे जाहीर करण्यात आले.

आंदोलनाला ७ जानेवारीपासून सुरुवात होईल. त्या दिवशी अमरावती येथील इर्विन चौकात धरणे आंदोलन, तर ८ जानेवारी रोजी या टोलविरोधात वरूड, मोर्शी, अमरावती येथील महत्त्वाच्या सर्व पोलीस ठाण्यांत टोलविरोधात फसवणुकीची तक्रार दाखल करण्यात येणार आहे.

नागपूर येथे केंद्रीय मंत्री नितीन गडकरी यांच्या घरासमोर १६ जानेवारी रोजी धरणे आंदोलन होईल. १८ ते २४ जानेवारी दरम्यान सर्व गावांमध्ये जनजागृती अभियान व टोल आंदोलनात सहभागी होण्यासाठी आवाहन करण्यात येणार आहे. २५ जानेवारी रोजी टोल नाक्यावर निर्णायक असे तिरंगा आंदोलन करण्यात येणार आहे.

बैठकीला टोलमुक्ती कृती समितीचे प्रदीप बाजड, विक्रम ठाकरे, जयवंत कोहळे, आशिष टाकोडे, संजय पांडव, नीलेश रोडे, आश्विन वाट, योगेश पोहोकर, नितीन पन्नासे, नईम खान, मोहन मडघे, भूषण कोकाटे, नीलेश गणथळे, धनंजय बोकडे, शिवा कपिले, नरेंद्र गोहाड, नीलेश गोमकाळे, प्रमोद ठाकरे आदी उपस्थित होते.