हत्या करून कडब्याच्या गंजीत मृतदेह जाळला

शेतातील झोपडीतच चौकीदाराची निर्घृण हत्या करून मृतदेह कडब्याच्या गंजीत जाळण्यात आला. ही घटना गुरूवारी सकाळच्या सुमारास उघडकीस आली. अशोक खैरे (५०,रा. वरूड, आठवडी बाजार)

वरूड : शेतातील झोपडीतच चौकीदाराची निर्घृण हत्या करून मृतदेह कडब्याच्या गंजीत जाळण्यात आला. ही घटना गुरूवारी सकाळच्या सुमारास उघडकीस आली. अशोक खैरे (५०,रा. वरूड, आठवडी बाजार) असे हत्या झालेल्या व्यक्तिचे नाव आहे.
विस्तृत माहितीनुसार, शहराला लागून निर्मल यावलकर यांचे शेत आहे. या शेतातील झोपडीत अशोक खैरे राहत होता. गुरूवारी नेहमीप्रमाणे कापूस वेचण्यासाठी मजूर महिला शेतात गेल्या असता त्यांना कडब्याच्या गंजीत अर्धवट जळालेल्या अवस्थेत इसमाचा मृतदेह आढळून आला. घाबरलेल्या या महिलांनी त्वरित शेतमालकाला माहिती दिली. शेतमालकाने पोलिसांना पाचारण केले. ठाणेदार अर्जुन ठोसरे यांनी घटनास्थळी भेट देऊन पाहणी केली असता अशोक राहत असलेल्या झोपडीत रक्ताचा सडा पडलेला आढळून आला. अशोक खैरे याच्या डोक्यावर वार करून त्याचा खून करण्यात आला व नंतर फरफटत नेऊन मृतदेह झोपडीपासून ३० फूट अंतरावरील कडब्याच्या गंजीत टाकून जाळण्यात आल्याचा अंदाज आहे.
खुनाचे गूढ कायम
मृत अशोक याला दारूचे व्यसन होते. तो गेल्या अनेक दिवसांपासून या शेतातील झोपडीत एकटाच राहून चौकीदारी करीत होता. अशोकचा खून कशासाठी व कोणी केला याचा तपास पोलीस करीत आहेत.
घटनास्थळाला डीवायएसपी नंदकिशोर शेळके यांनी भेट दिली. तसेच न्यायवैद्यक प्रयोगशाळेचे पथक, श्वान पथकालाही पाचारण करण्यात आले होते. स्थानिक गुन्हे शाखेचे एपीआय सातरकर, अरूण मेटे, संदीप लेकुरवाळे, शकील चव्हाण, प्रवीण भाकरे, वरूड पोलीस ठाण्याचे शेवतकर, पावडे, दिवाकर वाघमारे, उमेश निंभोरकर, भीमसिंग आदी पुढील तपास करीत आहेत. वरूड पोलिसांनी अज्ञात आरोपीविरूध्द भादंविच्या कलम ३०२, २०१ अन्वये गुन्हा नोंदविला आहे. (तालुका प्रतिनिधी)