संक्षिप्त बातमी

भातकुली : शहरातील जिल्हा परिषद पूर्व माध्यमिक उर्दू शाळेत नगरसेवक अब्दुल शफीक यांच्या हस्ते ध्वजारोहण करण्यात आले. यावेळी शाळा व्यवस्थापन समितीचे सदस्य, मुख्याध्यापक, शिक्षक, कर्मचारी उपस्थित होते. -------------

कळमखार येथून दुचाकी लंपास

धारणी : तालुक्यातील कळमखार येथून एमएच २७ सीआर ५४७७ क्रमांकाची दुचाकी लंपास करण्यात आली. २५ जानेवारीच्या रात्री ही घटना घडली. रवींद्र रमेशचंद्र राठोड (४९) यांनी याप्रकरणी धारणी पोलिसांत तक्रार दिली. पोलिसांनी गुन्हा दाखल केला आहे.

----------

दिवाणी, फौजदारी न्यायालयात ध्वजारोहण

भातकुली : येथील दिवाणी व फौजदारी न्यायालयात गणतंत्र दिनी न्यायाधीश ए.आर. टोंगसे यांच्या हस्ते ध्वजारोहण करण्यात आले. यावेळी भातकुली पोलिसांनी ध्वजाला सलामी दिली. भातकुली तालुका वकील संघाचे सदस्य व न्यायालयाचे कर्मचारी यावेळी उपस्थित होते.

------------

काणस शिवारातून मोटरपंप लंपास

नांदगाव खंडेश्वर : तालुक्यातील येणस येथील रहिवासी प्रफुल्ल रामराव रघुते (३२) यांच्यासह शेजारी शेत असलेले यज्ञेश्वर भुरे यांच्या काणस शिवारातील शेतातून मोटरपंप लंपास करण्यात आले. त्यामुळे त्यांचे १४ हजारांचे नुकसान झाले. २४ जानेवारीच्या रात्री हा प्रकार निदर्शनास आला.

------------

इसमाला मारहाण मद्यपीविरुद्ध गुन्हा

नांदगाव खंडेश्वर : तालुक्यातील शिवणी रसुलापूर येथे क्षुल्लक कारणावरून दारूच्या अंमलाखाली मारहाण करणाऱ्याविरुद्ध नांदगाव खंडेश्वर पोलिसांनी गुन्हा दाखल केला. १५ जानेवारी रोजी ही घटना घडली होती. पांडू शंकरलाल इंगोले असे आरोपीचे नाव आहे. त्याच्याविरुद्ध उमेश दिनकरराव जवंजाळ यांनी तक्रार दिली होती.

-----------

मुलीला फूस लावून पळविले

चिखलदरा : तालुक्यातील एका गावातून २० जानेवारी रोजी मुलीला पळवून नेण्यात आल्याची तक्रार दाखल करण्यात आली आहे. पोलिसांनी झिंगऱ्या बिसराम भुसुम (४५) याच्याविरुद्ध भादंविचे कलम ३६३ अन्वये गुन्हा दाखल केला आहे.

------------

वीजप्रवाहाने म्हशीचा मृत्यू

परतवाडा : मुगलाईपुरा येथील धरमू धोटेकर यांच्या धर्मकाट्याजवळील शेतात वीजप्रवाहाने मृत्यू झालेल्या स्थितीत सैयद तैयब अली (४५, रा. गुलजार कॉलनी) यांची म्हैस आढळून आली. ती १८ जानेवारी रोजी खुंटावरून सुटून पळाली होती. तक्रारीवरून परतवाडा पोलिसांनी धरमू धोटेकरविरुद्ध भादंविचे कलम ४२९ अन्वये गुन्हा नोंदविला.

-----

निमखेडबाजार येथे विवाहितेचा छळ

अंजनगाव सुर्जी : तालुक्यातील निमखेडबाजार येथील विवाहितेने पती मोहम्मद अली मोहम्मद शफीक, शेख जफर व चार महिलांविरुद्ध माहेरहून पैसे आणण्यासाठी छळ केला जात असल्याची तक्रार अंजनगाव सुर्जी पोलीस ठाण्यात दिली. पोलिसांनी भादंविचे कलम ४९८, ३४ अन्वये गुन्हा दाखल केला.

------------