आरोपीच्या अटकेसाठी मृतदेह तिवसा ठाण्यात

शेतीच्या व्यवहारात आर्थिक फसवणूक झाल्याने शेतकऱ्याने शेतातच विष प्राशन करून आत्महत्या केल्याची घटना शनिवारी तिवसा पोलीस ठाण्यांतर्गत काटपूर येथे घडली.

शेती व्यवहारात फसवणूक : काटपूरच्या किशोर सोनोने यांची आत्महत्या
तिवसा : शेतीच्या व्यवहारात आर्थिक फसवणूक झाल्याने शेतकऱ्याने शेतातच विष प्राशन करून आत्महत्या केल्याची घटना शनिवारी तिवसा पोलीस ठाण्यांतर्गत काटपूर येथे घडली. फसवणूक करणाऱ्याविरुद्ध सदोष मनुष्यवधाचा गुन्हा दाखल करावा, या मागणीसाठी नातेवाईकांनी मृतदेह रविवारी तिवसा ठाण्यात आणल्यामुळे तणावसदृश स्थिती निर्माण झाली होती. तिवसाचे ठाणेदारांनी आरोपींवर गुन्हा दाखल करून सायंकाळपर्यंत अटक करण्याचे आश्वासन दिल्याने तणाव निवळला.
किशोर पांडुरंग सोनोने रा. काटपूर असे मृत शेतकऱ्याचे नाव आहे. याप्रकरणात किशोर याचा मावसभाऊ भूषण यावले (रा.तिवसा) याने तिवसा ठाण्यात रविवारी तक्रार दाखल केली. यानुसार मृत किशोर याची काटपूर येथे सर्वे नं. ३४/१ एक हेक्टर ५२ आर पैकी २० आर शेतजमीन सिंचनाखाली होती. ही शेती विकणाऱ्या अमरावती येथील वंदना विजय सावरकर यांच्याशी १० लाखांचा व्यवहार १० फेब्रुवारी २०१५ रोजी झाला होता. वंदनाने २ लाख ८० हजार १०० रुपयांचे मुद्रांकावर इसारचिठ्ठी केली व १५ एप्रिल २०१५ ही शेत खरेदी करण्याची तारीख दिली. उर्वरित ७ लाख २० हजार रुपये खरेदीच्यावेळी देण्याचे ठरले. प्रत्यक्षात वंदनाने त्यांच्या परिचित सुनील वसंतराव ठाकरे (रा.अमरावती) यांच्या नावाने तिवसा दुय्यम निबंधक कार्यालयात १३ एप्रिल रोजी सदर शेताची खरेदी किशोरकडून केली व उर्वरित रक्कम नगदी न देता तेवढ्या रकमेचा चेक एचडीएफसी बँक, शेगाव नाका, अमरावती शाखेचा दिला. किशोरने चेक वटविण्यासाठी २५ एप्रिल रोजी बँकेत दाखल केला असता तो अनादर झाला. मृताने पैशाची मागणी केली असता वंदना यांच्याव्दारे किशोरविरुद्ध तिवसा ठाण्यात फसवणुकीची तक्रार दाखल करण्यात आली होती.
किशोर याने ९ सप्टेंबर रोजी वकिलामार्फत वंदना हिला नोटीस पाठविली होती. मात्र त्यालाच वारंवार फोन करून गुन्ह्यात अटक करण्याची धमकी देण्यात आली. त्यामुळे झालेली फसवणूक व त्रासाला कंटाळून किशोर याने शेतात कीटकनाशक औषध प्राशन करून आत्महत्या केली असल्याचे तक्रारीत नमूद आहे. आरोपीवर गुन्हा दाखल करुन अटक करण्यासाठी नातेवाईकांनी रविवारी किशोरचा मृतदेह तिवसा ठाण्यात आणला होता.
याप्रकणी तिवसा ठाण्यात वंदना विजय सावरकर अमरावती व सुनील ठाकरे यांच्याविरुद्ध भांदविच्या कलम ३०६, ३४ अन्वये गुन्हा दाखल करण्यात आला आहे.
ठाणेदार अनिल लाड यांचे मार्गदर्शनात स.पो. निरीक्षक तेलंग पुढील तपास करीत आहे.

मृत्यूपूर्व चिठ्ठीत फसवणुकीचा उल्लेख
मृतक शेतकरी किशोर सोनोने यांनी लिहिलेल्या मृत्यूपूर्व चिठ्ठीमध्ये शेतीच्या व्यवहारात ७ लाख २० हजार रुपयांनी. वंदना सावरकर व सुनील ठाकरे यांनी फसवणूक केल्याचा उल्लेख आहे. वंदनाच्या सांगण्यावरुन सुनीलला खरेदी करुन दिली व या रकमेचा चेक अनादर झाल्याचे नमूद आहे.

किशोर ठाकरे यांच्या आत्महत्येला कारणीभूत असणाऱ्या दोन आरोपींविरोधात गुन्हा दाखल करण्यात आला आहे. मृत्यूपूर्व चिठ्ठीवरील हस्तक्षराची हस्ताक्षर साकारुन तपासणी केली जाईल.
-मयुर तेलंग,
तपास अधिकारी, तिवसा ठाणे