भरधाव कार झाडावर आदळली

एकाचा मृत्यू, कुटुंबातील तिघे गंभीर, पिंपळखुटा लहान येथील घटना

मोर्शी : भरधाव कार झाडावर धडकल्याने एकाच कुटुंबातील चौघे गंभीर जखमी झाले. त्यातील एकाचा जिल्हा सामान्य रुग्णालयात नेताना मृत्यू झाला. अमरावती मार्गावरील पिंपळखुटा लहान फाट्यानजीक शनिवारी दुपारी ही घटना. चालकाचे कारवरील नियंत्रण सुटल्याने हा अपघात झाल्याचे प्रत्यक्षदर्शींनी सांगितले. जखमींपैकी एकाची प्रकृती चिंताजनक आहे. अरविंद इंगळे (६०, प्रज्ञा कॉलनी, मोर्शी) असे मृताचे नाव आहे.

जखमींमध्ये मोर्शी शहरातील प्रज्ञा कॉलनी येथील रहिवासी अरविंद इंगळे (६०) मंदा अरविंद इंगळे (५०), तुषार इंगळे (२७) व मोनिका तुषार इंगळे (२५) यांचा समावेश आहे. एमएच २७ बी ५४६३ या कारने हे कुटुंब अमरावतीकडे परत येत होते. पिंपळखुटा लहान फाट्यानजीक चालक तुषार इंगळे यांचे कारवरील नियंत्रण सुटून कारची झाडावर जाऊन आदळली. या धडकेत झाड अक्षरश: हलले. कारमधील चौघे गंभीर जखमी झाले. तर, कारचा दर्शनी भाग चकनाचूर झाला.

अमरावतीहून वरूडकडे जाणारे येथील अजय देशपांडे, नीलेश लोणकर यांनी इतर युवकांच्या मदतीने कारमध्ये अडकलेल्या जखमींना बाहेर काढून उपजिल्हा रुग्णालय मोर्शी येथे आणले. चारही जखमींचे हात पाय फ्रॅक्चर असून दोघांच्या डोक्याला गंभीर दुखापत झाल्याने चौघांना पुढील उपचारासाठी जिल्हा सामान्य रुग्णालयात हलिवण्यात आले. मात्र, अमरावती पोहोचण्यापुर्वीच अरविंद इंगळे यांचा वाटेतच मृत्यू झाला. १०८ क्रमांकाच्या रुग्णवाहिकेला कॉल करूनही ती जखमीच्या मदतीला घटनास्थळी पोहोचू शकली नाही. अखेर वरूड येथील राष्ट्रवादीचे कार्यकर्ते रोशन दारोकर यांच्या वाहनाने रुग्णांना मोर्शी येथील उपजिल्हा रुग्णालयात आणण्यात आले. यावेळी गजानन ब्राह्मणे, मधुकर पोहणे, सुशील शेळके, भूपेंद्र कुवारे, गजू अमझरे, सचिन कोहळे यांनी सुद्धा मदत केली.