लोणी मटन मार्केटमध्ये मारहाण

वरूड / जरूड : तालुक्यातील लोणी मटन मार्केटमध्ये एकमेकांना सुरी व काठीने मारहाण करण्यात आली. १ जानेवारी रोजी सकाळी १० च्या सुमारास ही घटना घडली. याप्रकरणी बेनोडा पोलिसांनी दोन्ही बाजूकडील आठ जणांविरूद्ध गुन्हा दाखल केला. मनीष संजय मदने (२२) यांच्या तक्रारीवरून मिथून रुपराव पारडे व शुभम ऊर्फ लालू पारडे (दोन्ही रा. लोणी) यांच्याविरूद्ध भादंविचे कलम ३२४, ३४ अन्वये गुन्हा दाखल करण्यात आला. फिर्यादी आणि आरोपींचे लोणी मटन मार्केटमध्ये दुकाने आहेत.

तक्रारीनुसार, मनीष मदने यांच्याकडे एक ग्राहक आला असता, आरोपी शुभम पारडे याने त्यास हटकले. मनीषने ती बकरी घरून कापून आणली, अशी शेरेबाजी केली. त्यावर आरोपी शुभमने मनीष मदन याचेवर सुरीने वार केला. मिथून पारडे याने जळत्या इंधनाच्या काठीने मारहाण केली. संजय मदने यांनादेखील काठीने मारून जखमी करण्यात आले. हा वाद सोडविण्यास आलेल्या मनीष मदनेच्या चुलत भावाच्या हाताला मार लागला. याबाबत १ जानेवारी रोजी दुपारी १.५८ मिनिटांनी तक्रार नोंदवून गुन्हे दाखल करण्यात आले, तर शुभम रुपराव पारडे (२९) याच्या तक्रारीवरून संजय मदने, रुपेश मदने, दौलत मदने, मनीष मदने, राजू मदने, नीलेश मदने (सर्व रा. लोणी) यांच्याविरूद्ध भादंविचे कलम १४३, १४७, १४८, १४९, ३२४, ३२३, ५०४ अन्वये गुन्हा दाखल करण्यात आला. शुभम पारडेच्या तक्रारीनुसार, एका ग्राहकाला आवाज देऊन बोलावण्यवाच्या कारणावरून सहाही आरोपींनी मिथून पारडे यास शिवीगाळ करून थापडाबुक्क्यांनी मारहाण केली. तसेच आरोपी रुपेश मदने याने शुभम पारडे याच्या डोक्यावर व आरोपी दौलत मदने याने डाव्या हातावर काठीने प्रहार करून जखमी केले. याबाबत १ जानेवारी रोजी दुपारी २.५२ वाजता गुन्हे दाखल करण्यात आले.

------------------