अमरावती : चोरीची दुचाकी विक्रीसाठी ग्राहक शोधत असलेल्या एका चोरट्याला स्थानिक गुन्हे शाखेने १२ जुलै रोजी मंगरूळ दस्तगीर पोलीस ठाण्याच्या हद्दीतून अटक केली. त्याच्याकडून दोन दुचाकी जप्त करण्यात आल्या आहेत.
संजय पांडुरंग पेलने (२२, रा. सोनेगाव खर्डा) असे अटक करण्यात आलेल्या आरोपीचे नाव आहे. संजय हा चोरीची दुचाकी विक्रीसाठी परिसरातील गावात ग्राहक शोधत असल्याची माहिती मंगरूळ दस्तगीर ठाण्याच्या हद्दीत गस्तीवर असलेल्या स्थानिक गुन्हे शाखेच्या पथकाला मिळाली. या माहितीच्या आधारावर पथकाने त्याला ताब्यात घेतले.
चौकशीत त्याने यवतमाळ व वर्धा जिल्ह्यातून दुचाकी चोरल्याची कबुली दिली. त्यानुसार त्याच्याकडून दोन दुचाकी जप्त करण्यात आल्यात. पुढील कारवाईसाठी त्याला मंगरूळ दस्तगीर पोलिसांच्या ताब्यात देण्यात आले. सदरची कारवाई स्थानिक गुन्हे शाखेचे पोलीस निरीक्षक किरण वानखडे यांच्या मार्गदर्शनात पोलीस निरीक्षक तसलीम शेख व मुलचंद भांबुरकर, चंद्रशेखर खंडारे, सचिन मसांगे, मंगेश लकडे, नीलेश मेहरे यांनी केली.