आलोडा ग्रामपंचायत सरपंच ठरले अपात्र

बेनोडा (शहीद):- नजीकच्या आलोडा ग्रामपंचायतीचे सरपंच नीलेश माधवराव निकम यांच्या वडिलांनी सरकारी जागेवर केलेल्या अतिक्रमण केल्याचा ठपका ठेवत संयुक्त कुटुंबातील सदस्य या नात्याने नीलेश निकम यांना सरपंचपदासाठी अपात्र ठरवीत असल्याचा निकाल जिल्हाधिकारी कार्यालयाने दिला आहे.

आँक्टोबर २०१७ च्या सार्वत्रिक ग्रामपंचायत निवडणुकीत नीलेश माधवराव निकम हे आलोडा ग्रामपंचायतीचे सरपंच म्हणून निवडणूक जिंकले. त्यांच्याविरुद्ध निवडणूक लढविणारे मनोहर परशराम दाभाडे यांनी सरपंचांचे वडील माधव गणपत निकम यांनी सार्वजनिक जागी अतिक्रमण केल्याचे प्रकरण जिल्हाधिकारी कार्यालयात दाखल केले. अर्जदार व गैरअर्जदार या दोन्ही बाजूंनी जिल्हाधिकारी कार्यालयात आपापल्या वकीलांच्या माध्यमातून अतिक्रमण प्रकरणाची माहिती सादर केली असता, दोन्ही पक्षाचे म्हणने ऐकल्यावर अपर जिल्हाधिकाऱ्यांनी दिलेल्या निकालात अतिक्रमण करून त्यावर ताबा मिळविल्याचा ठपका ठेवत ते अतिक्रमण नियमानुकूल केल्याचे कोणतेही दस्तावेज गैरअर्जदार सादर करू न शकल्याने अर्जदाराचा अर्ज मंजूर करण्यात आला आहे. सरपंच नीलेश निकम यांना आलोडामधील ग्रामपंचायत सरपंचपदाकरिता महाराष्ट्र ग्रामपंचायत अधिनियम १९५८ चे कलम १४ (१) (ज-३) नुसार अपात्र ठरविण्यात आल्याचा आदेश कार्यालयाने १९ जानेवारीला पारित करण्यात आला. अर्जदार मनोहर दाभाडे यांच्यावतीने वकील गिरीश धर्माळे यांनी युक्तिवाद केला.