कोरोनाच्या परीक्षेत अचलपूर नापास

परतवाडा : अचलपूरचे प्रशासन कोरोनाच्या परीक्षेत नापास झाले आहे. राज्य शासनाचे सल्लागार डॉ. सुभाष साळुंके यांच्या पाहणी दौऱ्यात प्रशासन आवश्यक किमान गुणही मिळू शकले नाही.

अचलपूरमधील वाढती कोरोनाग्रस्तांची संख्या बघता, मुख्यमंत्री व उपमुख्यमंत्र्यांच्या निर्देशनुसार डॉ. सुभाष साळुंके १६ फेब्रुवारी रोजी अचलपूर मध्ये दाखल झाले होते. त्यांनी अचलपूर, परतवाडा शहरांसह देवमाळी ग्रामपंचायत क्षेत्राला भेट देऊन परिस्थितीची पाहणी केली. अचलपूर सर्कीट हाऊसवर स्थानिक प्रशासनाकडून परिस्थितीचा आढावा घेतला. या आढावा बैठकीत ‘व्हॉट्सॲपप्रेमी’ अधिकाऱ्यांनी प्रशासनाची कार्यतत्परता त्यांच्यापुढे ठेवली. मात्र, नागरिकांना दोष देत जबाबदारी टाळणारे डॉ. साळुंके यांच्यापुढे उघडे पडले. कोरोनाच्या तयारीत प्रशासनाकडून होत असलेले दुर्लक्ष अगदी मवाळ भाषेत त्यांनी बैठकीत उघड केले. क्षेत्र भेटीदरम्यान कुणाच्याही तोंडाला त्यांना मास्क दिसला नाही. देवमाळीत काही घरांना प्रत्यक्ष भेटीत त्यांना गृह विलगीकरणाची योग्य व्यवस्था आढळून आली नाही. ज्यांना होम क्वारंटाईन केले आहेत, ते घरी आढळून आले नाहीत. खुलेआम शहरात भटकताना ते त्यांना दिसले. नागरिकांची गर्दी आणि सोशल डिस्टन्सिंगचा फज्जा उडत असल्याचे त्यांचे निदर्शनास आले.

परतवाडा शहरातील कल्याण मंडपम् येथील कोरोना केंद्राला डॉ. साळुंके यांनी भेट दिली. तेव्हा तेथील दुरवस्था स्वच्छतेचा अभाव बघून तेथील कोरोना संक्रमितांना इतरत्र हलविण्याचे निर्देश दिले. अगदी शहराबाहेर दूरवर बुरडघाट येथील आश्रमशाळेतील कोरोना केंद्रालाही त्यांनी भेट दिली. डेडिकेटेड कोविड रुग्णालय परिसराचेही त्यांनी अवलोकन केले.

कोरोना केंद्र पाहून संताप

कोरोना उपचार केंद्रावर रुग्णांना योग्य तो उत्तम आहार द्या. बेचव जेवण देऊ नका. चहा, नाष्टा आणि जेवणाच्या वेळा पाळा. कोरोना केंद्रावर मनोरंजनाकरिता टीव्हीची व्यवस्था करण्याचे निर्देश त्यांनी दिले. कल्याण मंडपम् येथील दुरवस्था व अस्वच्छता बघून ते संतापले. याठिकाणी रुग्ण ठेवू नका, येथून रुग्णांना हलवा, असे निर्देश त्यांनी प्रशासनाला दिले.

थेट सीएमओला माहिती

अचलपूरची ही कीर्ती डॉ. साळुंके यांनी मुख्यमंत्री व उपमुख्यमंत्र्यांच्या कानीही टाकली. एवढेच नव्हे तर अचलपूर दौऱ्याप्रसंगी शासन सतत डॉ. साळुंके यांच्या संपर्कात होते. त्यांनी आपल्या पाहणी दौऱ्यातील माहिती जिल्हाधिकाऱ्यांसह विभागीय आयुक्तांनादेखील दिली.

--------