अपघात ट्रकने, दुचाकींवर कारवाई, अवैध पार्किंग कायम

फोटो - दर्यापूर २८ एस

दर्यापुरात आणखी बळी जाण्याची भीती, वाहतूक पोलिसांची थातूरमातूर कारवाई

दर्यापूर : शहरातील गांधी चौकात नवविवाहितेचा ट्रकखाली चिरडून बुधवारी मृत्यू झाल्यानंतर शहरातील अनियंत्रित वाहतुकीवर सक्त कारवाई अपेक्षित होती. मात्र, गुरुवारी दिवसभरात काही दुचाकींवर कारवाई करीत वाहतूक पोलिसांनी आपली जबाबदारी आटोपली. मोठ्या वाहनांचे अवैध पार्किंग शहरभरात कायम असल्याने आणखी बळी जाण्याची भीती व्यक्त होत आहे.

बुधवारी दुपारी गांधी चौकात अनियंत्रित वाहतुकीमुळे नवविवाहित महिलेचा बळी गेला. त्यानंतर वाहतूक पोलिसांनी अवैध पार्किंगमध्ये उभ्या असलेल्या दुचाकी जप्त केल्या. मात्र, रस्त्यावर वर्दळीच्या वेळी धावणाऱ्या मोठ्या वाहनांचे काय, असा प्रश्न निर्माण झाला आहे. दर्यापुरातील बस स्थानक चौक ते बाजार समितीपर्यंत काळी-पिवळी वाहनांचे अवैध पार्किंग असते. वाहतूक पोलिसांची बस स्थानक चौकात गस्त असते. परंतु, ते कुठलीही कारवाई न करता बघ्याची भूमिका घेत असल्याचे चित्र या ठिकाणी पाहायला मिळते. खरेदी-विक्री संघासमोरील एका बाजूचा संपूर्ण रस्ता काळी-पिवळी वाहनांच्या अवैध पार्किंगने व्यापली आहे. त्या ठिकाणी मोठ्या प्रमाणात वाहतूक विस्कळीत होते.

----------

दोन महिन्यांपासून काम बंद

दर्यापूर शहरातील मुख्य मार्गाचे काँक्रीटीकरण होत आहे. मात्र, दोन महिन्यांपासून हे काम बंद आहे. त्यामुळे काही ठिकाणाहून वळून एकाच बाजून ये-जा करणारी वाहने आलेली असतात. त्यात रस्ता दुभाजकासाठी मिळालेल्या जागेचा वापर करीत अवैध पार्किंग केले जाते. अवैध पार्किंग व अपघातासाठी कारणीभूत ठरणाऱ्या या वाहनांवर त्वरित कारवाई करावी, अशी मागणी नागरिकांकडून होत आहे.

------------

अवैध पार्किंगमधील २५ दुचाकीवर कारवाई...

नवविवाहित रोहिणी काकड या बुधवारी अपघातात बळी पडताच पोलिसांनी सायंकाळी रस्त्यावर उभ्या असलेल्या २५ वाहनांवर कारवाई केली व त्यांना दंड देण्यात आला. काही दुचाकी पोलिसांनी ढकलतच ठाण्यात नेल्या. पोलिसांचा मोठा ताफा या कारवाईदरम्यान उपस्थित होता.

------------------

शहरात सार्वजनिक बांधकाम विभागामार्फत कोणत्याही प्रकारची पार्किंग नसल्याने त्या ठिकाणी वाहने उभी राहतात. अशा अवैध पार्किंगमधील वाहनांवर कडक कारवाई करण्यात येईल.

प्रमेश आत्राम, पोलीस निरीक्षक, दर्यापूर

--------------

फोटो कॅप्शन :- तालुका खरेदी विक्रीसमोरील अवैध पार्किंग. येथे दररोज वाहतूककोंडी निर्माण होते.